Nainsiriban nga Addang Sakbay ti Didigra

GAPU ta nataenganen dagiti annak ni Mary, nawayan ti tiempona ket inkeddengna ti mangala iti paset-tiempo a sekular a trabaho. Nupay kasta, idi imbagana dayta ken lakayna, a ni Enos, inlawlawagna a saanen a nasken nga aramidenna dayta. “No mabalinka a suportaran ken dagiti annak, sigurado a makasuportarak ta duduatan ita,” kunana. Imbes nga pagtrabahuenna iti sekular ni baketna, insingasingna a panunotenna buyogen ti panagkararag ti panagbalin a payunir, maysa nga amin-tiempo a manangiwaragawag ti Pagarian.

Nupay no tinagiragsak ni Mary ti panangiburay iti mensahe ti Pagarian kadagiti kaarubana, isut’ managbabain ken agkurang iti panagtalek. Kaskasdi, kayatna a suroten ti balakad ni lakayna. Gapuna, buyogen ti naglalaok a rikrikna, nagpasalista a kas maysa nga auxiliary a payunir idi Abril 1981.

Insigida a nakapatanor ni Mary iti ayat iti trabaho a panangikaskasaba ti Pagarian a dina pulos napasaran idi. Di nagbayag, mangikonkonduktan iti uppat a panagadal ti Biblia iti interesado a tattao. Iti uneg ti makatawen, nagbalinen a regular a payunir, a mangikonkondukta iti sangapulo a panangiyadal iti Bilbia. Ni Christine, maysa a Saksi ni Jehova nga addan ti dua nga annak nga ages-eskuela pay laeng, sireregta a nakikadua ken Mary kas partnerna iti panagpayunir. Dagiti babbaro nga interesado a tattao nangrugida a timmabuno kadagiti gimong iti lokal a Kingdom Hall, a sadiay rumangrang-ay ti nagsayaat nga espiritu ti panagpayunir. Ket dimteng ti kadaklan nga rag-o ni Mary idi a ti anakna a lalaki, a ni Christopher, pinilina a suroten ti naimbag nga ulidanna ket nagpayunir met.

Kalpasanna, giddato, idi 1985 dimteng ti didigra. Natalimudaw ni Mary. Ti aneurysm iti ulona nangiturong iti nakaro a panagpadara iti utek, ket iti uneg ti tallo nga aldaw ti 45-añosna a ni Maria natay.

Nupay kasta, bayat dagidiay uppat a tawen a panagpaypayunirna, nakaibangon ni Maria iti nagsayaat a pakasarsaritaan iti komunidadna. Ti pomponna ket tinabunuan ti nasurok a 300 a tattao, agraman ti adu a kaarruba. Maysa kadagiti timmabuno isut’ gayyemna idiay eskuelaan a nasdaaw iti pammati ni Mary, kayatnat’ makaadal iti ad-adu pay maipapan iti dayta, ket nagkiddaw a maaddaan iti panagadal iti Biblia. Ti ministerio ni Mary ket kaskasdi nga agbungbunga pay laeng.

“Maysaak met itan nga auxiliary payunir,” kunan Enos, “ngem tarigagayak laeng a kinaduak koma ni Mary idi isut’ agpaypayunir. Kankanayon a sarsaritaenna dagiti kapadasanna ket naragsakanak unay idi. Kinapudnona, dagidiay a sumagmamano a tawen isudat’ kararagsakan iti biagmi a dua, ngem ita laeng a maapresiarko no apay.”

Awan ti makaipadto inton dumteng ti “panawen ken di mapakpakadaan a pasamak,” a kas iti napasamak a di naipagpagarup iti kaso ni Mary. Nupay kasta, dagidiay agtalinaed a matalek kas manangiwaragawag ti Pagarian maisiguroda iti bagbagida ti nasayaat a pannakabigbig agpadpada manipud iti Dios ken iti tao, uray no iti imatang ti didigra.​—Eclesiastes 9:11; 11:1, 2.

[Dagiti ladawan iti panid 31]

Ti pannakiraman iti ministerio ket panawen a naimbag ti pannakausarna