“Dagiti Reseta Maipaay iti Panangpadakkel ti Naragsak ken Naballigi nga Anak”
ITI babaen daytoy a paulo, impablaak ti magasin a Medical Aspects of Human Sexuality ti maysa nga artikulo nga imbalabala ni Dr. Irene Jakab, maysa a propesor iti sikiatria iti maysa nga unibersidad, ti patienna a nasken tapno ti maysa nga anak ket mapadakkel nga agbalin a naballigi nga adulto. Maysa kadagiti ingrediente kadagiti “reseta[na]” ket isut’ pannakasapul dagiti nagannak nga ayaten ti anakda, nga isut’ iwanwanda iti no aniat’ naimbag ken dakes, ken sanayen nga agaramid kadagiti desision. Patienna a “dagiti reseta” ket piho a saanna koma nga iraman ti nadaras a panagpungpungtot iti biang dagiti nagannak, kinaperpekto, nalabas a panagdandanag, wenno kinalukay.
“Dagiti reseta” ni Dr. Jakab ket nasin-awda iti sadinoman a pakaipakatanda. Kinapudnona, rinibo a tawtawen ti napalabas, nangted ti Biblia ti umas-asping a balakad kadagiti nagannak. (Kitaenyo, kas pangarigan, ti Proverbio 4:1; 13:24; 22:6; Colosas 3:21.) Nupay kasta, inraman ti Biblia ti banag a di inraman ni Propesor Jakab: ti nakapatpateg a banag a panangisuro kadagiti annak nga ayaten ti Namarsuada ken panangammo a nalaing iti Saona. Nagsurat ni apostol Pablo: “Ket dakayo nga amma, dikay ruroden dagiti annakyo, no di ket idalanyo ida iti disiplina ken panangiturong-panunot ni Jehova.”—Efeso 6:4; Deuteronomio 6:4-7.
No awan ti kasta a panangsanay, mabalin a dumakkel dagiti annak nga awanan ti ankla iti moral. Ti resultana isuntot’ makadidigra iti daytoy imoral ken narugit a lubong.