Il-iliwenyo Aya ti Tiempo Inton . . .
□ natalgeden ti riknayo ken natalgedkayon iti pagtaenganyo—uray no aniat’ or-orasna iti aldaw?
□ saanen a kasapulan dagiti kandado, balunet, alarma, pagsiripan, dagiti alad, guardia, agbantay nga aso, ken dadduma pay a pamuspusan ti seguridad?
□ mabalinyo ti magna kadagiti lansangan nga agmaymaysa iti naan-anay a kinatalged, uray iti rabii?
□ dagiti makadangran a droga ken amin dagiti nainaig a problema ket adayodanto laengen a laglagip?
□ amin dagiti gubat agsardengdan, ken dagiti ig-igam saandan a maaramid wenno maurnong?
□ dikayton agaburido maipapan kadagiti narugitan a taraon, angin, ken danum?
□ ti terorismo, panang-hostage, ken pammutbuteng ti bomba naikkatdan a naan-anay?
□ dagiti rekursos naturales ti daga masalaknibanen, mataginayon, ken mausar a nainsiriban nga agpaay iti pagimbagan ti isuamin?
□ ti kinaagum ken kinaimut saanton nga isudat’ puersa nga agtigtignay iti sangatauan?
□ dagiti ubbing salimetmetanda ti kina-inosenteda ken managraemdanton kadagiti dadduma ken iti sanikuada?
□ dagiti tattao saandan a mairurumen ken mabikbiktima?
□ dagiti linteg ken regulasion nainkalintegandan ket sililinteg a maipaalagad nga agpaay a pagimbagan ti isuamin?
□ ti gobierno agaramiden ti desision a naibatay iti pudpudno a kasapulan ket saan a gaput’ politika?
□ ti wayawaya ken panagpapada saanto laengen a maikaskasaba no di ket maar-aramidto metten?
□ awanen ti kinapanglaw, no di ket amin maaddaanton ti aniaman a kasapulan maipaay iti salun-atda, pagimbaganda, ken ragragsakda?
□ dagiti ubbing maay-ayatdanton ken maasikasodan ken didan maab-abusar wenno mapampanawan?
□ ti sakit ken ipapatay naparmekdanton, ket awanen dagiti nakabutbuteng a saplit?
□ tunggal maysa a masarakanyo ket naasi, manangtulong, ken mapagtalkanda?
□ ti biag ti tunggal maysa pudno a maipatpategen, ket amin makasarakto ti naunday a ragsak?
□ ti relihion saanen a puersa a mamagbingaybingay, a mangiturong iti kinapanatiko, gura, ken gubgubat?
□ amin addaanen ti kinawadwad ken makaay-ayo a lugar a pagtaengan, ket ti kinaawan-pagtaengan naglabaston a banag?
No maikunayo ti wen iti aniaman nga adda iti ngato, interesadokayto a mangbasa kadagiti artikulo a sumarsaruno.