Nakakita ti Polieto iti Riles

TAWEN 1921 idi. Kadagiti kabambantayan ti Transvaal, a probinsia ti Sud Africa, maysa a bunggoy dagiti lallaki a manangmantener iti perokaril agtartrabahoda iti nawatiwat a pagpagnaan ti tren. Ti superbisor ti bunggoy, maysa nga Afrikaner nga agnagan Christiaan Venter, nakakita ti maysa a papel a naipasngat idiay sirok ti riles. Daytat’ maysa a polieto nga impablaak ti Watch Tower Bible and Tract Society.

Kalpasan ti panangpasardengna kadagiti trabahadorna, binasa ni Christiaan a napnuan interes ti polieto. Nagtaray a simmabet iti manugangna, a ni Abraham Celliers, ket siraragsak a kinunana: “Abraham, itan nasarakakon ti kinapudno!”

Di nagbayag kalpasanna, nagsuratda iti manangipablaak ti polieto a maipaay iti ad-adu nga impormasion. Kas sungbat, ti sanga ti Watch Tower Society ti Sud Africa nangipatulod ti kanayonan a literatura ti Biblia. Nagadalan a naimbag dagiti dua a lallaki dayta bayat ti panangaldawda ken agingga iti kaunggan ti rabii. Di nagbayag iranranuddan ti kinapudno kadagiti gagayyem ken ganggannaet.

Idi agangay, agpadpada a nagbalinen a dedikado a Saksi ni Jehova da Christiaan ken Abraham. Kas resulta ti kinaregta ken kinamatalekda, adu a taga Sud Africa ti natulongan a nakagteng iti pannakaammo ti kinapudno. Mainayon pay, nasurok a sangagasut iti kapuonanda ti aktibo a Saksi ni Jehova itatta! Maysa kadakuada ti agserserbi iti sangalubongan a hedkuarters dagiti Saksi ni Jehova idiay Brooklyn, Nueva York, ken ti maysa pay kadagiti opisina ti Watch Tower Society idiay Sud Africa.

Itatta, agarup 70 a tawtawen kamaudiananna, dagiti polieto ti Biblia agtultuloy nga addaandat’ nasken a paset iti panangisaknap ti mensahe ti Pagarian.