Mabayag Pay ti Pagarupda!
TI TAWEN, 609 K.K.P. Ti lugar, Jerusalem. Ti agpalpalawag, ni mammadto Jeremias. Impadtona ti pannakadadael ti ay-ayatenna a nasantuan a siudad, ti Jerusalem, maysa a pannakadadael nga umay agsipud ta dagiti Judio tinallikudanda ni Jehova ket inlumlomda dagiti bagbagida iti panagdaydayaw kadagiti ulbod a didiosen. Nakiramanda iti narugit a panagdayaw iti sekso kadagiti nangato a disso, nagidatonda kadagiti daton nga inumen kadagiti pagano a didiosen, dinaydayawda ti init ken bulan ken dagiti bituen, nagpuorda ti insienso ken Baal, ken indatonda dagiti annakda ken Moloc.—1 Ar-ari 14:23, 24; Jeremias 6:15; 7:31; 8:2; 32:29, 34, 35; Ezequiel 8:7-17.
Kadagiti matada ni Jeremias ket maysa a manangipukkaw ti didigra, agsobsobraan ti regtana, bumusbusor iti tunggal banag ken iti isuamin. Iti 38 a tawen pinakdaaran ida ni Jeremias; iti 38 a tawen isut’ rinabrabak dagiti umili ti Jerusalem. Agingga itoy a tiempo, dagiti tattao laklaksidenda ni Jehova, a kunkunada nga isut’ saan a maysa a puersa a pakaseknan. Kinunada: “Ni Jehova saanto nga agaramid iti naimbag, saanto met nga agaramid ti dakes” ken, “ni Jehova binaybay-anna ti daga, ket ni Jehova saan a makakita.”—Sofonias 1:12; Ezequiel 9:9.
Inkaskasaba da mammadto Jeremias ken Ezequiel ti pannakadadael ti Jerusalem, ngem awan napasamak. Gapuna inlaksid dagiti Israelitas ti aniaman a kaitungpalan ti kasta a sirmata iti kaaldawanda, a kunkunada: “Dagiti aldaw mayatiddogda, ket tunggal sirmata madadael.” Ngem ti sungbat ni Jehova iti daytoy ket: “Dagiti aldaw asidegen . . . Ta siak, ni Jehova, agsaoakto ti sao a sawekto, ket maaramidto. Saanton a maitantan, ta kadagiti aldawyo, O balay a nasukir, isawangkonto ti sao ket tungpalekto.”—Ezequiel 12:22-25.
Idi 609 K.K.P., dimteng ti tiempo tapno tungpalen ni Jehova ti saona. Kalpasan nga inwaragawag ni Jeremias ti pakdaar iti nganngani uppat a dekada, ti siudad ti Jerusalem ket linakub dagiti armada ti Babilonia. Sangapulo ket walo a bulan kalpasanna narpuog dagiti bakud, napuoran ti templo, ket kaaduan kadagiti umili naipanda iti pannakakayaw idiay Babilonia. Kas naipadto, nadadael ti siudad babaen ti kampilan ken bisin ken angol.—2 Ar-ari 25:7-17; 2 Cronicas 36:17-20; Jeremias 32:36; 52:12-20.
Pudno ni Jeremias. Kamali dagiti tattao. Mabayag pay ti pagarupda! Ti sirmata ket saan a tawtawen ti kabayagna. Daytat’ agpaay iti kaaldawanda.
Daytoy ket saan a gagangay a historia laeng. Ti napasamak iti Jerusalem ket naimpadtuan. Inyanniniwanna ti maysa a banag nga umay. Ti agdama-aldaw a Kakristianuan itaktakderanna ti nagan ni Kristo ket kunkunana nga isut’ adda iti pannakitulag iti Dios; kaskasdi isut’ magmagna kadagiti addang dagiti umili ti Jerusalem idi ugma. Iti pangkaaduan, dagiti simbaan ti Kakristianuan isursuroda dagiti pagano a doktrina, marugrugitanda iti seksual nga imoralidad, itantandudoda dagiti napolitikaan a ganuat, supsuportaranda dagiti gubat ti lubong, ab-abrasaenda ti ebolusion ket ipupuerada ti Dios kas Namarsua, palpalubosanda ti sakripisio ti minilion a di pay naiyanak iti altar ti nam-ay, ken sursurotenda dagiti natauan a pilosopia, a kunkunada a ti Biblia ket mitolohia ken sarsarita idi ugma.
No kasano a ti umili ti Jerusalem linalaisda ni Jeremias, kasta met a ti Kakristianuan lalaisenda dagiti Saksi ni Jehova itatta. Ti pakdaar dagiti Saksi ni Jehova iti um-umayen a pannakadadael idiay Armagedon ket mamatmatmatan nga awan mamaayna. ‘Saan nga interesado ti Dios ditoy daga,’ kuna ti Kakristianuan. ‘Bay-an nga iturayanna ti langit; iturayantayo ti daga. Ket no umay ti Armagedon, saanto nga iti kaputotantayo. Nangngegtay dayta nga istoria idin. Saantayo a paal-allilaw iti dayta!’
Maysa kadi daytoy a pannakaulit ti historia? Daytoyto kadi ti sabali pay a tiempo inton ti minilion matakkuatanda a mabayag pay ti pagarupda?