No Ania ti Kaipapanan ti Panagbalin a Kristiano

NI Jesus nangipaay ti awis iti panagbalin a pasurotna, a kunkunana: “No asinoman a tao ti mayat nga umay sumurot kaniak, paglikudanna ti bagina ket alaenna ti kayona a pagtutuokan ket sumurot kaniak.” (Mateo 16:24) Dagidiay a pudno a Kristiano addaanda ti naan-anay a pammati a ni Jesu-Kristo ket naisangsangayan a Napulotan ken bugbugtong nga Anak ti Dios, ti Naikari a Bin-i a nangidaton ti natauan a biagna kas subbot, napagungar ken napadayag idiay makanawan nga ima ni Jehova, ket immawat ti autoridad nga agturay kadagiti kabusorna ken alangonen ti nagan ni Jehova. (Mateo 20:28; Lucas 24:46; Juan 3:16; Galacia 3:16; Filipos 2:9-11; Hebreo 10:12, 13) Matmatan dagiti Kristiano ti Biblia kas ti napaltiingan a Sao ti Dios, ti naan-anay a kinapudno, naimbag a pakasursuruan ken pakadisiplinaan ti sangatauan.​—Juan 17:17; 2 Timoteo 3:16; 2 Pedro 1:21.

Ad-adu pay ti kasapulan kadagiti pudno a Kristiano ngem ti laeng basta panangipudno ti pammati. Nasken a ti panamati ket maiparangarang babaen kadagiti ar-aramid. (Roma 10:10; Santiago 2:17, 26) Naiyanak kas managbasol, dagidiay agbalin a Kristiano agbabawida, makumberteda, idedikarda ti biagda ken Jehova, tapno agdayaw ken agserbida kenkuana, ket kalpasanna agpabautisarda iti danum. (Mateo 28:19; Aramid 2:38; 3:19) Masapul a nadalusda manipud pannakikamalala, manipud idolatria, ken manipud pannangan ti dara. (Aramid 15:20, 29) Uksubenda dagiti daan a personalidad agraman dagiti panagpungpungtot, naalas a panagsasao, panagulbod, panagtakaw, panagbarbartek, ken “bambanag a kaasping dagitoy,” ket itunosda ti panagbiagda kadagiti prinsipio ti Biblia. (Galacia 5:19-21; 1 Corinto 6:9-11; Efeso 4:17-24; Colosas 3:5-10) “Awan koma kadakayo,” insurat ni Pedro kadagiti Kristiano, “ti agsagaba kas nakapapatay wenno kas mannanakaw wenno managdakdakes wenno kas bumibiang kadagiti bambanag dagiti sabsabali a tattao.” (1 Pedro 4:15) Dagiti Kristiano naasida ken mannakaawat, naemma ken naanus, siaayat a mangsansanay ti panagteppel. (Galacia 5:22, 23; Colosas 3:12-14) Ipaayan ken aywananda ti kabukbukodanda ket ayatenda dagiti kaarrubada kas kadagiti bagbagida. (1 Timoteo 5:8; Galacia 6:10; Mateo 22:36-40; Roma 13:8-10) Ti kangrunaan a pakabigbigan a kualidad a pakailasinan kadagiti pudno a Kristiano isut’ naisangsangayan nga ayatda iti maysa ken maysa. “Gapu itoy,” kinuna ni Jesus, “maammuandanto a dakayo dagiti adalak, no adda ayatyo iti maysa ken maysa.”​—Juan 13:34, 35; 15:12, 13.

Dagiti pudno a Kristiano tuladenda ti ulidan ni Jesus kas Naindaklan a Mannursuro ken Matalek a Saksi ni Jehova. (Juan 18:37; Apocalipsis 1:5; 3:14) “Inkayo . . . pagbalinenyo nga adalan dagiti tattao iti amin a nasnasion” ti bilin ti Panguloda. (Mateo 28:19, 20) Iti panangaramid iti dayta, dagiti Kristiano ‘mangaskasabada iti publiko ken iti binalay-balay,’ a bagbagaan dagiti tattao iti sadinoman a pumanawda manipud Babilonia a Dakkel ket ipaayda ti inanama ken panagtalekda iti Pagarian ti Dios. (Aramid 5:42; 20:20, 21; Apocalipsis 18:2-4) Talaga a naimbag a damag daytoy, ngem ti panangiwaragawag iti kasta a mensahe iyegna kadagiti Kristiano ti dakkel a pannakaidadanes ken panagsagaba, a kas napasaran ni Jesus. Saan a nangatngato kenkuana dagiti pasurotna; umdasen no umaspingda kenkuana. (Mateo 10:24, 25; 16:21; 24:9; Juan 15:20; 2 Timoteo 3:12; 1 Pedro 2:21) No ti maysa “agsagaba kas Kristiano, saan koma nga agbain, no di ket dayawenna koma ti Dios iti daytoy a nagan,” imbalakad ni Pedro. (1 Pedro 4:16) Ipaay dagiti Kristiano ken “Cesar” ti kukua dagiti nangatngato nga autoridad toy lubong​—pammadayaw, panagraem, buis​—ngem kagiddan dayta agtalinaedda a naisina manipud ar-aramid daytoy a lubong (Mateo 22:21; Juan 17:16; Roma 13:1-7), ket gapu itoy ti lubong guraenna ida.​—Juan 15:19; 18:36; 1 Pedro 4:3, 4; Santiago 4:4; 1 Juan 2:15-17.

Nalawag no apay a dagiti tattao nga addaan kakasta a nangato a prinsipio ti moralidad ken kinatarnaw, napakuyogan ti makatignay a mensahe a naipaay buyogen ti nabara a regta ken kinaprangka, alisto a naalada ti atension idi umuna a siglo. Dagiti misionero a panagbiahe ni Pablo, kas pangarigan, kas da la agsaknap nga apuy a nanguram ti tunggal siudad​—Antioquia idiay Pisidia, Iconium, Listra, Derbe, ken Perga iti maysa a biahe; Filipos, Tesalonica, Berea, Atenas, ken Corinto iti sabali​—a namagsarimadeng kadagiti tattao, namagpanunot, ken nangala ti takderda, nga umawat man wenno laksiden ti naimbag a damag ti Pagarian ti Dios. (Aramid 13:14–14:26; 16:11–18:17) Adu a ribo ti nangpanaw ti ulbod a narelihiusuan nga organisasionda, naimpusuan nga inabrasada ti Kinakristiano, ken sireregta nga innalada ti trabaho a panangaskasaba kas panangtulad ken Kristo Jesus ken dagiti apostol. Daytoy, kas nagbanaganna, nagbalinda a magurgura ken maidaddadanes, a kangrunaan nga insugsog dagiti ulbod a narelihiusuan a papangulo ken dagiti naallilaw a napolitikaan nga agtuturay. Ti Panguloda a ni Jesu-Kristo, ti Prinsipe ti Kappia, napapatay gapu ti pammabasol a sedision; dagiti managayat-talna a Kristiano ita ti napabasol a “mangriribuk ti ilitayo,” ‘mangriribuk iti lubong,’ ken tattao a ‘masupsuppiat iti isuamin a disso.’ (Aramid 16:20; 17:6; 28:22) Idi insurat ni Pedro ti umuna a suratna (agarup 62–64 K.P.) nalawag a ti trabaho dagiti Kristiano ket pagaammon kadagiti lugar kas ti “Ponto, Galacia, Capadocia, Asia, ken Bitinia.”​—1 Pedro 1:1.