“Dagiti Saksi ni Jehova?”

TI SALUDSOD iti ngato nagparang kas maysa a tema iti Finnish a pagsasao a Bulletin of the University of Helsinki. Iti sidong ti tema adda surat ni Propesor Jorma Palo, ket kunana iti pasetna: “Miningmingak a naimbag ti selio ti unibersidadtayo a naiyimprenta iti akkub ti Bulletin. Iti tengnga ti makingngato a kaguduana, nasarakak ti maysa a Hebreo a teksto a ti kaipapananna ket inyimtuodko iti maysa a sangailik a Judio. Sigun iti daytoy nga eskolar, a makaammo iti Hebreo, daytoy a sao ket ‘Jehova’ iti Pilandes.”

Ti kaadda ti personal a nagan ti Dios iti selio daytoy nga unibersidad a Pilandes sinurpresana ti adu. Kinapudnona, nupay kasta, ti unibersidad ket agtawenen iti 350, ket idi naipasdek daytoy, ti nagan a Jehova ket agdindinamag ken maus-usar iti intero nga Europa. Ti nagan agparang kadagiti di mabilang a publiko a patakder, sinsilio, ken selio a napetsaan kadagita a panawen.​—Kitaenyo ti broshur a The Divine Name That Will Endure Forever.

Iti siglotayo, saanen nga us-usaren ti Kakristianuan ti nagan ti Dios, ket dayta nga immun-una nga interes iti dayta ket sapasap pannakalipatnan. Maymaysa laeng a grupo ti mangus-usar iti nasantuan a nagan iti panagdayaw ken ipabpablaakna dayta, maitunos iti umuna a kiddaw iti Kararag ti Apo: “Amami nga addaka sadi langit, madaydayaw koma ti naganmo.” (Mateo 6:9) Isu dayta ti gapuna, a no ti nagan ket mailasin idiay selio ti unibersidad, dagiti tattao dagdagus a mapanunotda dagiti Saksi ni Jehova.

[Picture Credit Line iti panid 32]

Yliopisto