Relihion nga Addaan ‘Mannakibagay a Pammati’
“Ti abilidad ti Mormonismo a makapagtakder agpada kadagiti nawaya a demokrasia ken kadagiti totalitariano a kagimongan ket maysa a pagsidsiddaawan.” Kastat’ napaliiw ti The Wall Street Journal idi a ti gobierno ti Hungary impaayna ti naan-anay a panangbigbig iti Church of Jesus Christ of Latter-day Saints. Kasano a nagun-odan ti simbaan daytoy? “Ti tulbek,” sigun iti Journal, “ket saan laeng a gapu iti nangato a rukod ti irarang-ay ti bilang dagiti Mormon wenno iti narayray a panangisaknapda iti ebanghelioda. Imbes ketdi, daytat’ gapu iti kinamannakibagay a naibangon iti pammati.” Kasano a kasta?
No maipapan iti panawen sakbay dagiti kallabes a napolitikaan a panagbalbaliw idiay Makindaya nga Europa, kinuna ti Journal: “Babaen panangusarda kadagiti grupo ti musika ken sumasala manipud Brigham Young University, nabaelan dagiti Mormon a lisian ti panangiparit ken saan a pannakitunos a gagangay a maipaspasango kadagiti misionero kadagiti ngangngani amin a pagilian a Komunista,” kunaen ti Journal. Dagiti managpabuyada nakagtengda idiay Romania, Czechoslovakia, Hungary, Poland, Russia, ken China, kasta met idiay Saudi Arabia, Libya, Egipto, Jordan, Somalia, ken Israel. Ad-adda pay, “ti kinabaknang ti Iglesia a Mormon ket naaramat kas alikamen tapno makastrekda kadagiti Marxista ken Maikatlo a Lubong a pagilian.” Ti panagbangon iti puttot ken panagkali iti ubbog ket naibilangda kadagiti proyekto a supsuportaran ti donasion dagiti Mormon.
Iti managayat-ragragsak ken mabisin-kuarta a lubong ita, saan a nakaskasdaaw a ti kasta a kanta-ken-sala ken silulukata panangted iti kuarta a taktika addaan nabileg a panangawis. (2 Timoteo 3:2, 4) Ngem dagiti pudno a marakarnero a tattao ket maawisda gapu iti timek ti Naimbag a Pastor, ni Jesu-Kristo. (Juan 10:27) Dayta ti gapuna, nga idi binilinna dagiti pasurotna nga “agaramid ad-adalan kadagiti tattao iti amin a nasion,” saanna a kuna kadakuada nga aramidenda ti kasta babaen aniaman a pamay-an wenno iti aniaman a pamusposan no di ket babaen ‘panangisuro kadakuada a salimetmetanda amin dagiti bambanag nga imbilinna.’ (Mateo 28:19, 20) Iti panangitungpalda itoy a komision, awan lugarna ti panangikumpromiso kadagiti pagalagadan ti Biblia.