Kasapulantay ti Maysa nga Agimdeng
KAS tattao, pagreggetantayo a biruken ti rag-o ken pannakapnek iti biag. Ngem no tumaud dagiti personal a parikut, anian a makatulong unay ken makaliwliwa ti maaddaan maysa a pangisaritaan kadagiti pakariribukantayo!
Kunaen ni Dr. George S. Stevenson: “Ti panangisarita kadagiti bambanag tumulong a mangpabang-ar iti panagdukotyo, tulongannakayo a makakita a nalawlawag iti pakadanaganyo, masansan tulongannakayo a makakita no aniat’ maaramidanyo maipapan iti dayta.” Napaliiw ni Dr. Rose Hilferding: “Kasapulantayo amin nga iyallatiw dagiti pakariribukantayo. Kasapulan nga iyallatiwtayo dagiti pakadanagantayo. Kasapulan a mariknatayo nga adda maysa ditoy lubong a sidadaan nga agimdeng ken makaawat.”
Siempre, awan tao a naan-anay a makaakem iti daytoy a kasapulan. Gapu kadagiti limitasion iti tiempo ken sabsabali pay a makagapu, dagiti natauan a panangikumpableantayo mabalin nga awanda no kasapulantayo unay ida, wenno mabalin nga agpangngaduatayo a mangsalaysay kadagiti dadduma a bambanag uray kadagiti kasisingedan a gagayyemtayo.
Dagiti pudno a Kristiano, nupay kasta, pulos a saanda a naan-anay a maawanan iti agimdeng a lapayag, gapu ta ti dalan ti kararag ket kanayon nga adda. Maulit-ulit a paregtaennatayo ti Biblia nga agkararag iti Dios, ti Namarsuatayo, a ti naganna ket Jehova. Naiwanwantayo nga agkararag buyogen kinapasnek, iti nagan ni Jesus, ken maitunos iti pagayatan ti Dios. Uray dagiti personal ken pribado a bambanag ket umiso met a tema ti kararag. “Iti isuamin . . . maipakaammo koma dagiti dawdawatyo iti Dios,” naibaga kadatayo idiay Filipos 4:6. Anian a naidumduma a sagut! Ti Soberano nga Agturay ti uniberso ket kankanayon a nakasagana a mangabrasa ken umawat iti karkararag dagiti napakumbaba nga adipenna kaanoman a tarigagayanda ti umadani kenkuana.—Salmo 83:18; Mateo 6:9-15; Juan 14:13, 14; 1 Juan 5:14.
Kaskasdi, pudno kadi nga agimdeng ti Dios? Dadduma mabalin nga agduduada no ti kinaepektibo ti kararag ket nakedngan iti abilidad ti tao: Agkararag ti maysa a tao, nga urnosenna dagiti kapanunotanna ken iyebkasna ida kadagiti sasao. Kalpasan ngarud panangipabigbigna iti parikutna, isut’ bumirok iti maitutop a solusion ket sisisiglat iti aniaman a mabalin a makatulong iti pannakasarakna iti dayta. Inton marisuten ti parikutna, mabalin a padayawanna ti Dios, ngem kinaagpaysuanna ti bukodna a panunot ken panagregget ti nangpataud kadagiti matarigagayan a resulta.
Adut’ mangipagarup ita a talaga a kasta laengen ti kararag. Kasta kadit’ panangipagarupyo? Ti kadi bileg ti kararag ket nakedngan iti kasta? Ipantayon, dagiti mental ken pisikal a panagregget ti maysa a tao maitunos kadagiti kararagna napateg ti akemda iti iyaawat kadagiti sungbat. Ania ngay, nupay kasta, ti maipapan iti mismo nga akem ti Dios iti dayta a banag? Agimdeng kadi ti Dios no agkararagkayo kenkuana? Ibilangna kadi a napateg dagiti kararagyo, nga utobenna ti linaonda ken ipangagna ida?
Dagiti sungbat kadagitoy a saludsod ket napateg. No saan nga agasikaso ti Dios kadagiti kararagtayo, no kasta ti kararag ket awan dumana iti banag nga adda laeng iti panunot. Iti sabali a bangir, no ti Dios awaten ken imdenganna buyogen interes ti tunggal kararagtayo, ania ketdin ti panagyamantayo gapu iti kasta a probision! Rebbeng a daytat’ mangtignay kadatayo a mangusar iti dayta a probision iti inaldaw.
Awisendakayo, ngarud, a bumasa, bayat a dagitoy a salisal ket naiturongda iti sumaganad nga artikulo.