Immayda Agpapan Pay Sikur ken Peggad
TI PETSA ket Enero 2, 1992. Ti lugar—Maxixe, Inhambane Province. Dagiti ungor iti rabii ti Mozambique ket nasinga unay bayat a napagtokar ti radio. “Dagiti Saksi ni Jehova ang-angayenda ti ‘Dagiti Managayat iti Wayawaya’ a Kumbensionda iti probinsiatayo,” impadamag ti brodkaster. “Ti panggepda ket tapno isuroda dagiti tattao maipapan iti no kasano a masarakan ti pudno a wayawaya iti lubong ita. Maabrasa amin a tumabuno.”
Sadiay iti dayta nga adayo a paset ti Africa, maar-aramid idi ti maysa a pasamak a malaglagipto! Iti damdamona, maysa a distrito a kumbension dagiti Saksi ni Jehova ti maang-angay, ket 1,024 a tao ti adda sadiay tapno tagiragsakenda dayta. Sumagmamano a tawen ti napalabasen, ti kasta a pasamak ket saan a pulos a maangay a sipapanayag idiay Mozambique, yantangay ti trabaho dagiti Saksi ni Jehova ket adda idi iti sidong ti pannakaparit. Kayatyo kadi a denggen ti maipapan kadagiti natured a panagsakripisio a naaramidan tapno matabunuan daytoy a kumbension?
Ti Inhambane Province, kas kadagiti adu a sabsabali a paset ti Africa, ket aglaplapusanan ti kinapintasna. Dagiti sinan-dhow a pagkalap a bilog nga addaan nagtallo-kasuli a layag ti agdaliasat iti baybay manipud iti igid ti baybayna. Nakaad-adu dagiti silag. Ngem maysa a nalaad a partaan ti mangkemkemmeg kadagiti aw-away: guerra sibil!
Para kadagidiay matmaturog iti uneg ti sinilag a kalapaw kadagiti nasapa nga oras ti bigat, saan a karkarna ti mariing kadagiti nakabaw nga uni dagiti napipigsa nga armas kadagiti kaparanget nga away bayat a dagiti gubat kadagiti kabakiran ti umatipukpok iti agpatnag. Masansan a dagiti awan basolna nga umili ti agsagaba. No dadduma dagiti ubbing ket makita nga agkarkaradap nga awanen wenno naputdan dagiti sakada. Uray dadduma a Saksi ni Jehova ti nadunor dagiti rupa ken bagida manipud kadagiti kinarungsot a sagsagabaenda.
Iti sidong dagitoy a kasasaad ti “Dagiti Managayat iti Wayawaya” a Kumbension ket inapresiar unay dagiti amin a timmabuno. Agpapan pay posibilidad ti pannakasaneb nga agturong idiay kumbension, adu a grupo dagiti pamilia manipud kadagiti aw-away ti determinado a mapan. Ti ipapan sadiay ket saan met a kumportable, yantangay ti publiko a pagluganan ket kaaduanna iti likod ti dakkel, awan didingna a trak. No dadduma aginggat’ 400 a pasahero ti agdadaipit iti maymaysa a trak! Adu kadagitoy a trak ti aglilinia tapno mangpormada iti grupo a kaduaan dagiti nagtagiigam a kumuykuyog a militar.
Ni Nora ken dagiti tallo nga annakna a babbai, nga agtawen iti maysa, tallo, ken innem ket maysa a pamilia a nangirisgo iti biagda babaen panagdaliasat iti kastoy a pamay-an. Inyurnonganna iti uppat a bulan tapno adda pagpleteda. Ti kinapudno nga awan masinunuo a pagdagusan idiay kumbension ti saan a nangupay kenkuana. Kaduana dagiti adu pay a sabsabali, ni Nora ken ti pamiliana ti basta nagluto, nangan, ken naturog lattan iti kannag idiay mismo a nakaangayan ti asamblea.
Uray pay ti nauyong a pudot a pinasarunuan ti bumalagabag a tudo dina masebseban ti di matengngel a pannakaay-ayo dagiti kakabsat a mangtagtagiragsak a sangsangkamaysa iti naespirituan a rambak. Nariknada nga awanen napatpateg pay kadakuada ngem ti kaaddada iti dayta a kumbension. Nagdagup ti 17 dagiti tattao a nangisimbolo iti dedikasionda kadagiti nabara a danum ti Indian Ocean. Bayat a naaramid ti bautismo, maysa a dakkel a bunggoy dagiti agbuybuya ti sangsangkagiddan a natignay nga agkanta kadagiti daydayaw ni Jehova.
Daytoy a grupo dagiti managdayaw ket pudpudno a natakuatanda no ania ti kaipapanan ti agbalin a managayat iti nadiosan a wayawaya. Kuna ni Hans, maysa a pannakabagi manipud kabisera, ti Maputo: “Nakitatayo ti pangrugian pay laeng ti maysa a baro a panawen iti trabaho dagiti Saksi ni Jehova iti daytoy a paset ti Africa.”