“Ti Asawa ti Kinaagtutubom”

“TI PANNAKIKAMALALA ket kasla maysan a gagangay a pasamak.” Kuna ti adu nga eksperto, sigun iti Los Angeles Times. Pagsiddaawennakay aya ti kasta a komento? Kaskasdi, pattapattaen ni sikiatrista a Frank Pittman nga agarup 50 porsiento nga assawa a lallaki ken manipud 30 porsiento inggat’ 40 porsiento nga assawa a babbai ti di matalek. No pudno dayta, gistay kagudua kadagiti amin a naasawaan a tattao ti makikamkamalala!

Kayat a sawen kadi dayta a saan a dakes ti imoralidad? Saan a pulos! Ti panagsaknap ti di kinamatalek dina pagbalinen a nalinteg dayta​—no kasano a ti ilalanlan ti krimen kadagiti lansangan dina pagbalinen nga umiso a takawan ti sabali. Makadangran ti imoralidad. Kas pangarigan, masapsaplit ita ti sangatauan kadagiti nakasaksaknap a napeggad a sakit a maiyakar iti sekso nga amin dagita nalaka koma a nalapdan no nadalus ti kabibiag dagiti tao. Ti makapapatay a sakit nga AIDS di koma nagraira no saan a nalulok ti seksual a kabibiag dagiti tao.

Maysa pay, uray dagiti kamodernuan ken “nalawlawagan” mariknada ti nakaro nga ut-ot no di matalek dagiti assawada. Ti maysa a tignay ti di kinamatalek mangpatanor kadagiti sugat nga umimbag iti kagudua ti kapaut ti panagbiag.

Nupay kasta, ti kapapatgan a punto ket ti panangtagilag-an kadagiti sapata ti panagasawa ket nakaro a di panagraem iti Dios, gapu ta isut’ Autor ti panagasawa. Kunaen ti Biblia: “Ti panagasawa nadayaw koma kadagiti isuamin.” Napakdaarantayo met: “Ti Dios ukomennanto dagiti mannakiabig ken dagiti mannakikamalala.”​—Hebreo 13:4.

Ngarud, dagiti masirib a tao ipangagda dagiti naipaltiing a sasao a: “Pagragoam ti asawa ti kinaagtutubom.” (Proverbio 5:18) Sapulenda ti pannakapnek ken kinaragsak kadagiti assawada. Iti kasta saluadanda ti pisikal ken emosional a salun-atda, ken kapapatgan iti amin, maidaydayawda ti naindaklan nga Autor ti panagasawa, ni Jehova a Dios.