Sigud a Historiko nga Ospital Nagbalin a Karkarna a Kingdom Hall
IDI 1770 ti nalatak nga Ingles a manangtakuat a ni Teniente James Cook ti manglaylayag ti 369-tonelada a barko a managan Endeavour iti di pay natakuatan a makindaya nga igid ti baybay iti Australia. Idi rabii ti Hunio 11, natupar ti barko ti maysa a dakkel a bato iti adayo a paset iti amianan ti kontinente. Kasta unay ti pannakadadael ti casco ti barko. Kinasapulan unay ti dagus a pannakatarimaan tapno maisalakan dagiti aglaylayag. Ti wangawangan ti asideg a karayan ti nagbalin a nasayaat a lugar a pagtarimaanan, a nagpaut iti innem a lawas. Sangagasut ket tallo a tawen kalpasanna, ti balitok ket natakuatan iti daytoy a lugar. Simmangpet ti adu a tao gapu iti balitok! Pinullo a ribo ti immay nangsapul ti gasatda. Naipasngay ti Cooktown.
Idi 1879 napatgan ti pammalubos ti gobierno a mangipatakder ti maysa a permanente nga ospital a mangaywan kadagiti agsakit ken dagidiay madangran kadagiti aksidente iti pagminasan. Iti isu met laeng a tawen, iti sabali a paset ti lubong, nairuar ti kaunaan nga edision ti Zion’s Watch Tower idi Hulio 1. Nanipud idin, daytoy a magasin ti nangipaay ti maysa a programa nga agpaay iti naespirituan a salun-at dagiti minilion a managbuteng-Dios a tattao. Saan pay laeng a naammuan idi nga iti maysa nga aldaw ti naibangon nga ospital idiay Cooktown ket maaddaanto ti nadekket a pakainaigan iti daytoy a magasin.
Kalpasan ti nasurok a maysa a siglo, kasapulanen a masukatan ti Cooktown Hospital. Adda idin dagiti kasapulan a pundo ti gobierno agpaay iti baro a patakder, isu a naidawat nga idatag dagiti interesado a gumatang ti kontratada a mangikkat ti patakder ti daan nga ospital. Ti National Trust of Queensland nangipakita ti dakkel nga interes iti daytoy historiko a patakder. Nupay kasta, dakkel unay ti magasto iti panangiyakar ken panangbangon ti patakder. Awan ti naidatag a pannakitinnawar.
Iti dandani isu met laeng a tiempo, agsapsapul ti bassit a kongregasion dagiti Saksi ni Jehova idiay Cooktown iti permanente a lugar a pakaangayan dagiti Nakristianuan a gimong. Awan dagada ken addaanda laeng ti $A800. Kasano a makaibangonda ti maysa a Kingdom Hall? Nagboluntario dagiti pannakabagi ti lokal a kongregasion a mangiyakar iti patakder ti ospital a dida agpabpabayad. Kasanot’ panangiturong ni Jehova kadagiti bambanag? Anian a makaparagsak a damag! Napatgan ti dawatda!
Ita ti sumaganad a banag—daga a pagbangonan. Wen, naikuna kadakuada nga agparang a ti daga ti gobierno ket mabalin a maipaay a libre, no la ket ta mataginayon ken maisubli ti patakder. Ngem iti daytoy a tiempo, nariing ti ibubusor ti maysa a paset ti komunidad iti naisingasing a proyekto. Naisagana ti maysa a petision a nairanta a mangpasardeng kadagiti plano dagiti Saksi. Nagwaras ti sayangguseng a sakupenton dagiti Saksi ni Jehova ti Cooktown, iserrada dagiti amin nga otel ken pagsusugalan, ken iparitda ti panaglako ti tabako. Siempre, saan a pulos a napasamak daytoy, ngem rumigrigat ti pananggun-od ti daga a nabaliwan ti pakausaranna ken ti panangala kadagiti kasapulan nga anamong iti panagbangon. Umad-adanin ti panagpatingga ti naikeddeng a panangikkat ti patakder. Naidawat ti ibaballaet ti State Government of Queensland. (Idiligyo ti Roma 13:2.) Napatgan a dagus ti pammalubos nga usaren ti daga ti gobierno, ket naited ti pammalubos iti panagbangon. Ita ta ik-ikutandan nga agpadpada ti daga ken ti patakder, aniat’ sumaruno?
Simmangpet ti bunggoy dagiti ginasut a Saksi, addaan kapadasan a trabahador ken katulongan manipud nagduduma a paset ti Estado ti Queensland, a situtulok a nangitukon ti panawenda ken kinasigoda a mangbangon a nakadardaras iti Kingdom Hall. Nangidatag daytoy a proyekto kadagiti naisangsangayan a karit: panangiyalis iti paspaset ti duat’-kadsaaranna nga ospital iti baro a lugar ken panangsangal manen iti pasdek. Ti panagtutudo ket umad-adanin. Mairingpas met laeng ngata ti trabaho iti naikeddeng a tiempo? Dadduma kadagiti umili ti agduadua. Ngem di nagbayag, ti imbilang ti dadduma nga imposible ket nairingpas met laeng. Idi Abril 1986 naiyakar ti patakder ken kalpasanna naisubli met laeng ti dati a kinadayagna.
Amin dagitoy nga aramid saan a di nadlaw, kas inyanninaw dagiti komento iti Anglican Newsletter iti Cooktown. Iti pasetna kunana: “Di pagduaduaan a mababalawak, ngem . . . kumitakayo iti Simbaan nga Anglikano ken kitaenyo ta saan a napunno ti tao ken paliiwenyo ti sabali a grupo [dagiti Saksi ni Jehova] ket makitayo a nagadu ti tumabuno iti gimongda . . . , napunno kadagiti Anglikano ken Katoliko . . . Ammoyo kadin a maysa nga organisasion . . . ti gimmatang ti daan nga Ospital tapno bangonenna manen nga agbalin nga awaganda a simbaan agsipud ta ti Eskuelaan a paggigimonganda dinan malaon ida amin? . . . Nagkapuytayon, ta impalubostayo a mapasamak daytoy.”
Rinibo a turista ti bumisita iti Cooktown iti tinawen. Umayda tapno tagiragsaken ti napintas a buya ti nalasbang a kabakiranna ken ti Great Barrier Reef ken tapno adalen ti pakasaritaan ti lugar. Ti Captain Cook Museum ket nalatak a pakaawisan dagiti kaaduan a sangaili. Nanipud 1989 ti historiko a Cooktown Hospital nga itan ket Kingdom Hall dagiti Saksi ni Jehova nagbalin metten a kangrunaan a pakaawisan dagiti turista. Dagiti tiendaan nga aglako kadagiti pakalaglagipan mangilaklakoda kadagiti tualia ken T-shirt nga addaan ladawan ti Cooktown Hospital-Kingdom Hall a naiyimprenta kadagitoy. Bayat ti panawen a kaadu dagiti turista, adda iti baet ti innem a gasut ken sangaribo a tattao ti sumarungkar iti patakder iti tunggal lawas tapno makitada a mismo ti karkarna nga arkitektura iti 1879.
Ti magasin a pagaammon kas Ti Pagwanawanan ket nawayan a magun-odan dagiti sangaili. Sipud pay 1879 daytoy a magasin immadun ti sirkulasionna iti nasurok a 15 milion a kopia iti mamindua iti makabulan iti 111 a pagsasao. Iturongna dagiti tattao iti kari ti Biblia a dadduma kadagiti kaputotan ti 1914 ti sibibiagto pay a makakita ti pannakaisubli ti naimbag a salun-at iti sangatauan agpadpada iti pisikal ken iti naespirituan. (Isaias 33:24) Pagbalinento dagiti minilion a situtulok a boluntario ti isuamin a daga a paraiso. (Salmo 37:29) Apay a dikay sumarungkar iti Kingdom Hall iti lugaryo? Makasarakkayto iti napatpateg a banag ngem ti isuamin a balitok a nakali idiay Cooktown.—Proverbio 16:16.