‘Dagiti Langlangit Ipalawagda . . . ’

Agarup 150 milion a kilometro manipud iti yanyo, umap-apuy ti kinaraniag ti init idiay langit. Napagrukbaban kas maysa a dios iti rinibo a tawen, ti nadayag a nailangitan a kaarrubatayo ket, kinapudnona, maysa a pammaneknek iti pannakabalin ti Namarsuana, “ti Nangaramid iti langit ken daga.” (Salmo 115:15) Napateg iti biag ditoy daga ti raniag ken barana. Ken pagsiddaawennatayo dagiti bambanag a naammuan dagiti sientista maipapan iti dayta.

Naibaga kadatayo a mangpatpataud ti init ti nawadwad nga enerhia. Ammoyo kadi a kurang a kagudua a billionth laeng iti pudot ken lawag a patpataudenna ti dumanon ditoy daga? Kaskasdi, 240,000,000,000,000 horsepower ti katupag dayta a paset!

Kasano a patauden ti init dayta nga enerhia? Babaen ti nagdakkelan a nuklear nga urno iti tengngana a mangpataud iti enerhia babaen ti panangkonsumona iti agarup 3.6 milion metriko tonelada ti edrohena kada segundo. Makaparagsak agpaay iti sangatauan, adda umdas nga enerhia iti init tapno agtultuloy daytoy a proseso iti binilion a tawen.

Dadduma a bambanag a natakuatan dagiti sientista ti namataud kadagiti kanayonan pay a saludsod. Kas pangarigan, kanayon nga agpigerger ti init, kas iti galba no matiruan ti martilio. Apay? Kasta met, usigenyo daytoy: Ti gumilgil-ayab a tengnga ti init isu ti kapudotan a paset ken no ad-adayo ti maysa a tukad manipud iti tengnga, nalamlamiis met dayta. Ngem no iti makinruar a tukad ti atmospera ti init, ti corona, agbaliw dayta. Napudpudot ti corona ngem dagiti tukad nga as-asideg iti umap-apuy a tengnga. Apay?

Maysa pay, bayat nga agtayyek ti init, a kas ti daga, agtayyek met dagiti nadumaduma a pasetna iti nadumaduma a kapartak. Kas pangarigan, naparpartak ti panagtayyek ti rabaw ngem dagiti tukad iti uneg. Apay? Ken kasano a posible dayta? Sa adda dagiti sunspots. Umadda ken agawan dagitoy a piglat iti rabaw ti init iti regular a siklo iti las-ud ti 11 a tawen. Apay nga agbaliwda iti kasta a regular a pamay-an?

Nupay adu pay ti maammuan maipapan iti init, ti ammotayon pagsiddaawennatayo a buyogen panagraem iti Namarsuana, ni Jehova. Tunggal makitatayo ti init, mapalagipantayo a “dagiti langlangit ipalawagda ti dayag ti Dios; ket ti law-ang ipakitana ti aramid ti imana.”​—Salmo 19:1.