Inabakna ti Premio

“UTANGKO amin dayta kadakayo,” insurat ni Kiyoe, maysa a senior high school, iti sanga ti Watch Tower Society idiay Japan. Aniat’ pagyamyamananna unay? Inabak ni Kiyoe itay nabiit ti kadakkelan a premio iti maysa a sangapagilian a salip iti panagsurat, a ginastosan ti Japan Traffic Safety Association. Nayon ti napateg a premio ti panagbaniaga idiay Sweden.

Nagsurat ni Kiyoe tapno iyebkasna ti panangapresiarna kadagiti adu a nasayaat a publikasion nga impablaak ti Watch Tower Bible and Tract Society, a kunana a dakkel naitulongda kenkuana a nagballigi. Malaksid itoy a salip, isu ti nangibagi iti pagadalanna iti adu a salip iti panagbitla ken panagsurat. “Iti kaaduan kadagitoy a salip,” kunana, “adda maited a tema, ket agsukisok dagiti estudiante iti libraria iti suratenda. Ngem diak pakaaburiduan dayta. Masarakak dagiti nagsayaat a material iti libraria idiay balaymi!” Ituloyna: “Uray ania ti tema, maipapan man iti parikut ti panaglakay, aglawlaw, internasional a relasion, wenno panangpasayaat iti bagi, masansan nga addaan ti magasin a Pagwanawanan wenno Agriingkayo! iti nauneg a panangsalaysay kadagita.”

Nupay kasta, saan laeng a dagiti publikasion ti nakatulong ken ni Kiyoe. Kunana a ti edukasion a naawatna kadagiti programa a panangisuro dagiti Saksi ni Jehova ti timmulong kenkuana a nangparang-ay iti panagbasa ken panagsuratna, ket daytoy ti nakatulong kenkuana a nangabak kadagiti salip. “Naminsan, talaga a kayatko ti agadal iti unibersidad,” akuenna. “Ngem pakagun-odak pay ngay iti kastoy a panagsanay?” Ita inanamaenna ti tumulong iti amin a tiempo kadagiti dadduma a magunggonaan manipud iti edukasion a naawatna. Nupay naragsakan iti premiona iti panagsurat, pagreggetan unay ni Kiyoe a gun-oden iti gunggona a biag.​—Idiligyo ti Filipos 3:14.