Report Dagiti Manangiwaragawag ti Pagarian
TI 1992 tawen serbisio ti nagbalin a narigat unay a tawen kadagiti kakabsat idiay Yugoslavia. Nupay kasta, makaparagsak latta dagiti kapadasanda. Umuna a nangrugi ti gubat idiay Slovenia, kalpasanna idiay Croatia, ken kamaudiananna idiay Bosnia ken Herzegovina. Iti maysa laeng a tawen, iti maymaysa a republika, pinagreggetan dagiti lima a baro nga Estado nga ipasdek dagiti bukodda a pagbeddengan, linteg, ken kuarta. Ginasut a Saksi ti napilitan a nangpanaw kadagiti pagtaenganda ken napadagusda a kadua dagiti kakabsatda iti dadduma a lugar. Natudingan dagiti emergency committee iti daddadakkel a siudad, a mangaywan kadagiti pagdagusan, taraon, ken kawes dagiti agkasapulan a kakabsattayo. Bayat ti 1992 tawen serbisio, agarup 55 a tonelada ti taraon ti naibunong kadagiti kakabsat kadagiti kongregasion nga adda kadagiti nariribuk a lugar. Adu a surat ti panangapresiar ti naawat.
Insalaysay dagiti kakabsat idiay Dubrovnik ti panagyamanda iti inawatda a tulong. Bayat nga iyaw-awid ti maysa a kabsat a babai ti nabungon a taraonna, dinamag ti maysa a kaarruba no gimmatanganna kadagiti itlog. Kinuna kenkuana ti kabsat nga impatulod ida dagiti naespirituan a kakabsatna manipud iti sabali a lugar. Nasdaaw ti kaarrubana. Iti maysa pay a pasamak, immawag ti maysa a di-ammo a lalaki a taga Slovenia iti maysa a panglakayen ket kinunana: “Nadamagko a mangibumbunong dagiti Saksi ni Jehova iti taraon nga inawatda manipud kadagiti kakabsatda iti umiso a pamay-an. Nangipatulodakon iti sumagmamano a bungon kadagiti tattao; nupay kasta, saanda a pulos a nakagteng kadagiti nairanta a pakaipananda. Mabalin kadi nga ipatulodko laengen kadakayo dagiti tulong, ken dakayo laengen ti mangibunong?” Kasta met a nagsayaat ti panangipadamag dagiti diario ken radio iti trabahotayo a panangtulong.
Siaammo ti maysa a kabsat a nabautisaran iti internasional a kumbension idiay Zagreb idi 1991 kadagiti kumarkaro a pakarigatan ket ginatangna ti maysa a tiendaan ti taraon. Impanna ti taraon iti balayna nga asideg iti paggugubatan. Bayat a limmanlan ti ikikirang ti taraon, daytoy nga abasto ti nagbalin a pudno a bendision kadagiti kakabsat.
Mabalin ti gumun-od ti pammalubos para iti maysa a dakkel a trak a mangidanon kadagiti tulong a taraon kadagiti nalakub a kakabsat idiay Sarajevo. Maragsakankam a mangibaga a naballigi ti pannakaipatulod dagitoy.
Adu a biag dagiti sibilian ti inraman ti dangadang. Iti panagngudo ti tawen serbisio, innem kadagiti kakabsattayo a lallaki ken babbai ken dua nga interesado ti natay, ket dadduma ti nadangran.
Ipakita dagiti adu a kapadasan a maysa a salaknib ti panagbalin a Saksi ni Jehova. Iti maysa a pasamak, agbibiahe dagiti kakabsat nga agturong iti kumbension distrito idiay Belgrade idi a ti bus ket pinasardeng dagiti soldado, a nangdamag no adda kadakuada ti kameng ti maysa a relihion. Awan ti insungbat dagiti kakabsat. Napilitanda a nangipakita kadagiti kard a pakabigbiganda, ket dadduma kadakuada ti addaan iti pakabigbigan a kamengda iti dayta a relihion. Inakusaran ida dagiti soldado iti panagulbod, ngem naitugot dagiti kakabsat ti pammaneknek iti panaglusulosda iti simbaan; nupay no nakaiyanakanda dayta a relihion, inlawlawagda a Saksi ida itan ni Jehova, nga agbibiahe nga agturong iti pagkumbensionan. Gapu itoy, pinalubosan idan dagiti soldado.
Siaammo a kanayon dagiti kakabsat a pasetda iti maysa nga internasional a panagkakabsat. Nupay kasta, gapu iti 1991 Managayat iti Nadiosan a Wayawaya nga Internasional a Kumbension, ken ita ti internasional a trabaho a panangtulong nga agpaay kadakuada, maawatanda ti pudno a kaipapanan ti panagbalin a paset dayta naayat a panagkakabsat.—Juan 13:34, 35.
Itultuloy dagiti payunir ti serbisioda a buyogen ti di agbaaw a kinaregta, ket pudno a daytoy ti mangpappapartak iti trabaho. Ti Pagwanawanan, iti makaay-ayo a de-kolor nga akkubna, ket maipatpatarusen a maigiddan kadagiti kangrunaan a pagsasao iti dayta a rehion. Regular a mangipapaay dayta kadagiti managayat iti kinapudno ken kinalinteg iti naespirituan a “pannakabagida a taraon iti umiso a tiempo.” (Lucas 12:42) Bayat ti 1992 tawen serbisio, 674 a kabbaro a kakabsat a lallaki ken babbai ti nabautisaran, ket 17,229 ti timmabuno iti panangrambak iti Panglaglagip.