Dagiti Saludsod Manipud Kadagiti Managbasa
Idiay Roma 9:3, kinuna ni apostol Pablo: “Ta no mabalin tarigagayak a siak met laeng mailunodak koma a maisina ken Kristo gapu kadagiti kakabsatko, kakabagiak no maipapan iti lasag.” Kayatna kadi a sawen nga isakripisiona ti biagna tapno maisalakan dagiti padana a Judio?
Impasdek ni Jesus ti kasayaatan nga ulidan ti ayat. Situtulok nga intedna ti kararua, wenno biagna, agpaay iti managbasol a sangatauan. Bayat iti publiko a ministeriona, inusarna ti bagina agpaay kadagiti kailianna—dagiti Judio—tapno mairamanda met kadagidiay adu a magunggonaan iti daton a subbot nga intedna. (Marcos 6:30-34) Ti di panangikankano ken panangbusorda iti mensahe ti pannakaisalakan pulos a di nangpakapuy iti naayat a pannakaseknan ni Jesus kadagiti Judio. (Mateo 23:37) Ket nangibati ‘iti ulidan tapno surotentayo dagiti addangna.’—1 Pedro 2:21.
Posible kadi para kadagiti imperpekto a tao ti sumurot iti ulidan ti ayat nga intuyang ni Jesus? Wen, ket naiyilustrar daytoy iti kaso ni apostol Pablo. Maseknan unay kadagiti padana a Judio ta, gapu iti panagayatna kadakuada, kinunana a tarigagayanna nga isu laengen ti “mailunod koma a maisina ken Kristo” gapu kadakuada.
Nagusar ni Pablo iti maysa a kita ti hyperbole, wenno panaglablabes, tapno maipaganetgetna ti puntona. Nagusar ni Jesus ti umasping nga hyperbole idiay Mateo 5:18, idi a kinunana: “Agingga iti mapukaw ti langit ken daga, uray la koma no maysa a jota wenno tulnek dinto mapukaw iti Linteg, agingga ti isuamin matungpalda.” Ammo ni Jesus a saan mapukaw ti langit ken ti daga. Ket saan met a mailunod ni Pablo, wenno awaten amin dagiti Judio ti Kinakristiano. Ngem ti punto ni Pablo ket aramidenna ti amin a kabaelanna tapno matulonganna dagiti Judio a mangaprobetsar iti pamay-an ti Dios a mangisalakan babaen ken Jesu-Kristo. Di pakasdaawan a pinaregta ti apostol dagiti padana a Kristiano: “Tuladendak koma, a kas ti panangtuladko ken Kristo”!—1 Corinto 11:1.
Ita, rumbeng a maaddaan dagiti Kristiano iti isu met laeng a pannakaseknan kas kada Jesus ken Pablo kadagiti di manamati. Ditay koma palubosan a ti kinaawan interes wenno naan-anay nga ibubusor dagiti tao iti pangaskasabaantayo ti mangpakapuy ti panagayattayo kadagiti padatayo a tao ken ti regtatayo a tumulong kadakuada a mangammo iti dana ti pannakaisalakan.—Mateo 22:39.