Kas iti Maysa a Kayo

“DAGITI maag a kas kaniak ti mangar-aramid kadagiti daniw, ngem ti Dios laeng ti makaaramid iti kayo.” Iti panangitan-okna iti adu a pateg dagiti kayo, pinadayawan ni mannaniw a Joyce Kilmer ti Dios gapu iti panangparsuana kadagitoy.

Pinarsua ni Jehova a Dios dagiti kayo a nadumaduma ti kita, kinadayag, ken usarda. Agpadpada dagiti babassit ken naidumdumat’ kadakkelda a kayo, nakapimpintasda unay ket awan ti sao a makailadawan kadagitoy. Mainayon pay, mangipaay dagiti kayo ti taraon, pagsungrod, ken pagbalay. Ken awan sardayna nga agtaktakkuat dagiti diseniador kadagiti baro a pakausaran ti kayo.

Idiay Biblia, masansan a mausar dagiti kayo iti piguratibo a mangirepresentar kadagiti pagarian, agtuturay, ken dagiti indibidual. (Ezequiel 31:1-18; Daniel 4:10-26) Nadakamat dagiti kayo mainaig kadagiti naragsak, natalna, ken nabunga a kasasaad a resulta ti kinaari ni Jehova ken pannakaisubli ti ilina. (1 Cronicas 16:33; Isaias 55:12; Ezequiel 34:27; 36:30) Ikari met ti Kasuratan a dagiti al-aldaw ti ili ti Dios umaspingdanto iti maysa a kayo. (Isaias 65:22) Dakkel ti kaipapanan daytoy no panunotentayo a dagiti dadduma a kayo ket agbiag iti sinigsiglo.

Kinuna ti salmista iti Biblia a ti tao a maragsakan iti linteg ti Dios “kaslanto iti maysa a kayo a naimula iti sibay dagiti ay-ayus ti danum, nga ipaltuadna ti bungana iti karbenganna, a ti bulongna met saan a malaylay, ket isuamin nga aramidna rumang-ayto.” Ti nalangto a kayo a naimula iti igid ti waig ipalagipna iti salmista ti espiritual a kinabaknang a sagsagrapen ti maysa a “ti pakaragsakanna adda iti linteg ni Jehova.” (Salmo 1:1-3) No pudpudno a kaay-ayoyo ti linteg ken Sagrado a Sao ti Dios, dagiti al-aldawyo agbalin a kas iti maysa a kayo. Kinapudnona, no agtignaykayo a maitunos iti pudno a pannakaammo ken Jehova a Dios ken ni Jesu-Kristo, matagiragsakyo ti namnama a biag nga agnanayon.​—Juan 17:3.