Ni Abraham​—Naitanem Ditoy, Ngem Sibibiag Pay?

Iti adu a siglo, pinaspasiar dagiti Judio, Muslim, ken Kristiano daytoy a lugar.

Mabalinyo a sarungkaran daytoy iti kadaanan a siudad ti Hebron, abagatan ti Jerusalem. Maaw-awagan daytoy a patakder iti Haram el-Khalil ken ti Tanem dagiti Patriarka. Wen, anamongan daytoy ti kaaduan kas ti nakaitaneman dagiti patriarka kas kada Abraham, Isaac, ken Jacob, agraman dagiti assawada a da Sara, Rebecca, ken Lea.

Laglagipenyo a sigun iti Biblia, idi natay ti patpatgenna nga asawa, ni Sara, gimmatang ni Abraham iti maysa a rukib kas disso a pagitaneman ken daga idiay Macpela, iti asideg ti Hebron. (Genesis 23:2-20) Kamaudiananna, naitanem met ni Abraham ditoy, kasta met dagiti dadduma pay a kameng ti pamiliana. Adu a siglo kalpsanna, iti aglikmut ti tradisional a disso a pagitaneman, nangbangon ni Herodes a Dakkel iti maysa a makaay-ayo a patakder nga idi agangay rinitubar ken pinadakkel dagiti manangparmek, a mangiyan-anninaw kadagiti bukodda a narelihiusuan a pammati.

No sumrekkayo, makakitakayo iti innem a cenotaph (dagiti monumento wenno awan nagyanna a panteon). Naipakita iti makin-uneg a ladawan ti para ken Isaac, anak a lalaki ni Abraham. Iti asideg dayta adda dagiti abut iti suelo, a mausar tapno makastrek iti sirok. Nakasarak dagiti imbestigador kadagiti siled a naglaon kadagiti adu a tultulang.

Ni ngay Abraham? No naitanem iti rukib nga adda ita iti sirok daytoy a disso, no kasta nabayagen a natay, saan aya? Umanamong ti kaaduan a bumisbisita. Nupay kasta kinuna ti maysa a mammadto a dakdakkel ngem ni Abraham nga iti kinapudnona sibibiag pay laeng ni Abraham. Kasano? Ket ania ti mabalin nga epekto daytoy iti pammatiyo?

Pangngaasiyo ta basaenyo ti artikulo a “Dagiti Natay a Patpatgenyo​—Sadino ti Yanda?” (Panid 3) Iparang dayta no ania ti kinuna dayta a naindaklan a propeta maipapan ken Abraham a sibibiag, maysa nga impormasion nga addaan dakkel a pateg kadakayo ken iti pamiliayo.