Ti Bileg ti Naasi a Sao
“Ti nalpay a puso gaput’ danag, anian ti panangpabang-ar kenkuana ti naasi a sao!”—Proverbio 12:25, Knox.
SAAN a mailisi a naan-anay dagiti Kristiano manipud iti pakarigatan. No dadduma, agsagabada iti pakadukotan gapu ta agbibiagda kadagitoy a “napeggad a tiempo a narigat a pakilangenan.”—2 Timoteo 3:1.
No agsagsagaba iti kasta a pakarigatan, anian a bendision ti pannakangngeg kadagiti naasi a sasao manipud iti matalek a gayyem! “Ti pudno a gayyem agayat iti amin a tiempo, ken maysa a kabsat a nayanak no adda riribuk,” kuna ti Biblia. (Proverbio 17:17) Ti matalek a lalaki a ni Job ket nabigbig gaput’ panagbalinna a kasta ti kitana a gayyem. Naikuna pay ni Elifaz kenkuana: “No adda naitibkol, nakapsut ken nabannog, dagiti saom ti mangparegta kenkuana a tumakder.”—Job 4:4, Today’s English Version.
Nupay kasta, idi kasapulan ni Job ti pammaregta, saan a nangyebkas ni Elifaz ken dagiti kakaduana kadagiti naasi a sasao. Binabalawda ni Job iti pakadukotanna, nga iparparipiripda nga adda la ketdi ilimlimedna a biddut. (Job 4:8) Kinuna ti The Interpreter’s Bible: “Ti kasapulan ni Job ket asi manipud iti natauan a puso. Ti magunggun-odanna ketdi isu ti agsasaruno a naan-anay a ‘pudno’ ken naan-anay a napipintas a narelihiusuan a daanen a kapanunotan wenno awan pigsanan a moral a pagsasao.” Napalalo ti pannakariribuk ni Job idi mangngegna ti bitla ni Elifaz ken dagiti kakaduana nga uray la inyikkisna: “Kasano ti kapaut ti panangpaungetyo iti kararuak ken panangdudogyo kaniak kadagiti sasao?”—Job 19:2.
Pulos a ditay koma pagsangiten a sisasaem ti padatayo nga adipen ti Dios gapu kadagiti di naannad, makapasakit a sasaotayo. (Idiligyo ti Deuteronomio 24:15.) Mamakdaar ti maysa a proverbio iti Biblia: “Ti saom mabalinna a pagtalinaeden ti biag wenno dadaelen dayta; isu a masapul nga awatem dagiti ibunga ti sasaom.”—Proverbio 18:21, TEV.
Iti panangbigbig iti bileg ti sasao, surotentayo ti ulidan ni apostol Pablo. Kabayatan ti kaaddana idiay Macedonia, “pinaregtana dagiti adda sadiay babaen ti adu a sasao.” —Aramid 20:2.