Apay a Rumang-ay Dagiti Nadangkes?

“APAY nga agtultuloy nga agbiag dagiti nadangkes?” Daytoy a saludsod ti nabayagen nga inyimtuod ni matalek a Job, ket adun a daras a naulit-ulit daytoy manipud idi kaaldawanna. Nalabit a daytoy ti adda iti panunot ti adu a tattao iti teritoria ti sigud a Yugoslavia (kas iti babai a naipakita iti akkub) nga agladladingit gapu kadagidiay agsagsagaba iti nakaal-alingget a gubat. Apay a makalasat dagiti nadangkes a tattao ken rumang-ayda pay? Kas kinuna ni Job, masansan a “kinatalna mismo dagiti balbalayda, nawaya manipud iti buteng, ken awan kadakuada ti pang-or ti Dios.”​—Job 21:7, 9.

Kaipapanan kadi daytoy nga awan mamaayna ti panagserbi iti Dios, panagayat iti kaarruba, ken panangliklik iti panagaramid iti dakes? Pulos a saan! Ipaayannatay ti Biblia iti umiso a panangmatmat iti panangikunana: “Dika padpadasen nga atiwen dagiti managdakdakes wenno tuladen dagidiay agar-aramid iti dakes. Ta magangodanto a kas iti ruot, ket malaylaydanto a kas iti nalangto a mula iti primavera. Agtalekka iti APO ket agaramidka iti naimbag.”​—Salmo 37:1-3, The New English Bible.

Wen, apagbiit laeng ti pammarang nga irarang-ay dagiti nadangkes. Kinapudnona, nakaab-ababa ti biagda, idinto ta dagidiay agserserbi iti Dios addaanda iti nadayag a namnama iti masanguanan. Iti saan a mabayag, matungpalton ti kari ti Dios: “[Ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.” (Apocalipsis 21:4) Dagiti laeng nalinteg, saan a dagiti nadangkes, ti makaimatangto iti dayta a panawen. Anian a pammaregta iti yaadani iti Dios ken panangsursuro nga agaramid iti pagayatanna, uray pay kasanot’ kinadakes dagiti adda iti aglawlawtayo!