Kasano Kapateg ti Biag Kadakayo?

NATAY ti maysa nga agtutubo a lalaki idi timpuak iti maikawalo a kadsaaran ti maysa nga apartment. Nabásana ti maysa a libro a nangiladawan iti panagpakamatay babaen ti itatappuak kas “nawaya iti ut-ot wenno danag wenno buteng; nakagangganas ketdi.” Kinuna ti autor daytoy a libro, a naipablaak idiay Japan, nga ididiayana laeng ti “panagpakamatay kas maysa kadagiti pagpilian iti biag.”

Saan laeng a dagiti tattao nga agpakpakamatay ti awanan panangilala iti biag itatta. Ipakpakita met dagiti kaskasero a drayber a bassit ti panangipategda iti biag. Adda pay ketdi dagiti agmaneho uray no nakainumda, nga adu kadakuada ti nakaparpartak ti panagpatarayda iti dalan nga agturong iti ipapatay.

Ipakpakita dagiti dadduma a saanda unay a kailalaan ti biagda babaen ti panangipangrunada iti ragragsak. Di kayat dagiti mannigarilio nga isardeng ti panagsigarilioda, nupay mabalin a mangiturong ti panagsigarilio iti ipapatay ken naawagan dayta iti in-inut a panagpakamatay. Imbes a taginayonenda ti kinadalus iti daytoy a lubong nga agmauyong iti sekso, adu ti sumursurot iti nalulok a kabibiag a masansan nga agtungpal iti ipapatay.

Di mapupuotan dagiti dadduma a paab-ababaenda ti biagda iti adu a tawen babaen ti nalabes a pampannangan, nalabes a panagin-inum, kurang a panagwatwat, ken panangsapul iti ragragsak. Namallaag ti mannurat a Hapones a ni Shinya Nishimaru: “Dadaelen ti di magawidan a pampannangan ti panagandar ti bagi, ket ti panangsapul iti bin-ig a nam-ay ken ragsak ibusenna ti pigsa dagiti tattao.” Umas-asping ti panangmatmat dagiti dadduma iti panangmatmat dagiti tattao idi un-unana a nagkuna: “Mangantayo ken uminumtayo, ta inton bigat mataytayo.”​—Isaias 22:13; 1 Corinto 15:32.

Wen, nasaknap ita ti kinaawan panangipateg iti biag. Gapuna, maitutop la unay nga isaludsod, Kasano kapateg ti biag kadakayo? Rumbeng kadi a saluadan ti biag iti aniaman a gatad? Ken adda kadi pay napatpateg ngem ti agdama a biagtayo?