Bassit Ngem Nabileg

NI Robert, maysa a lalaki a taga-Canada, nagdaliasat iti intero nga Europa nga agsapsapul iti panggepna iti biag. Adu a bambanag ti nakitana a namagbalin kenkuana a makarikna iti kinaawan namnama maipapan iti masanguanan.

Bayat a situtugaw iti maysa a restauran idiay Seville, España, napaimaan ni Robert iti maysa a tract nga impablaak dagiti Saksi ni Jehova. Idi damo, nagpangadua ni Robert. “Nupay kasta, binasak dayta,” kinunana. “Diak mailawlawag, ngem pagammuan ta nariknak ti maysa a banag a nakappapati. Kadagiti panagdaliasatko, nakitak ti nakaad-adu a kita ti panagleddaang ken pannakapaay ti tao, ket naupayak ta diak kabaelan a baliwan dagiti bambanag. Kalpasan ti panangbasak iti tract, nayimtuodko, ‘Posible ngata nga adda “baro a lubong?”’ Kalpasanna, nautobko, ‘Wen, mabalin a posible.’”

Buyogen ti napabaro a namnama, nagsurat ni Robert iti opisina dagiti Saksi ni Jehova idiay Canada, nga agkidkiddaw iti mangsarungkar kenkuana apaman a makaawid ken tumulong kenkuana a mangtarus iti Biblia.

Awan duadua, dagiti mayebkas a sasao ket nabileg. Nupay kasta, pulos a saantay a tagtagibassiten ti bileg ti naimaldit a mensahe. Uray kasanot’ kabassitna, addaan iti nabileg a pangallukoy dagiti naibatay-Biblia a publikasion. Apektaranda ti panunot ken puso, a mangipaay iti sigurado a namnama iti masanguanan.​—Hebreo 4:12.