Kinamanagpartuat​—Maysa a Naparabur a Sagut ti Dios

MARAGSAKAN ni Jehova kadagiti banag a pinarsuana. (Salmo 104:31) Ti nalaus a pannakapnek a nagun-odanna iti panangparsuana ket nayebkas iti Genesis 1:31: “Ti Dios nakitana amin nga inaramidna ket, adtoy! nasayaatda unay.”

Saan a binukbukodan ni Jehova daytoy a rag-o. Impaayanna ni Jesus iti pribilehio nga agbalin nga ahente, wenno instrumento, a babaen kenkuana naparsua dagiti amin a sabsabali pay a bambanag. (Juan 1:3; Colosas 1:16, 17) Kas “mamangulo nga agobra,” ‘siraragsak met a kanayon [ni Jesus] iti sango [ni Jehova].’​—Proverbio 8:30, 31.

Ngem saan laeng nga idiay langit ti pakasarakan iti kinamanagpartuat. “Naisigud daytoy iti sangatauan,” insurat ni Eugene Raudsepp iti librona a How Creative Are You? Saan a naiparparna daytoy, ta naaramid ti tao a kaladladawan ti Dios. (Genesis 1:26) No kasta, impaayan ni Jehova ti sangatauan kadagiti makapnek nga abilidad a mangpartuat.​—Santiago 1:17.

Gapuna, saan ngarud a pakasdaawan a nasayaat ti panangdakamat ti Biblia iti panagkanta, panagsala, panagabel, panagluto, kinaartesano, ken dadduma pay a paglaingan. (Exodo 35:25, 26; 1 Samuel 8:13; 18:6, 7; 2 Cronicas 2:13, 14) Inaramat ni Bezalel, maysa nga artesano, ti talentona iti “panagdisenio kadagiti instrumento” tapno tumulong iti pannakaibangon ti tabernakulo. (Exodo 31:3, 4) Mabalin a ti pastor a ni Jabel ti imbentor ti tolda, maysa a produkto ti kinamanagpartuat a mangpanam-ay iti nomadiko a panagbiag. (Genesis 4:20) Saan laeng a kumakanta ken mammutar ni David, no di pay ket managaramid kadagiti baro nga instrumento ti musika. (2 Cronicas 7:6; Salmo 7:17; Amos 6:5) Mabalin nga inurnos ni Miriam ti naragsak a panagsala kas panangrambak iti datdatlag a pannakaispal dagiti Israelita iti Nalabaga a Baybay.​—Exodo 15:20.

Ti kinamanagpartuat ket masansan a pakairanudan iti panangitandudo iti pudno a panagdayaw. Nangputar ni Jesus kadagiti ilustrasion ken pangarigan tapno maipaawat ti mensahena. Kasta met a naigunamgunam kadagiti adalanna nga “agtrabaho a sipipinget iti panagsao ken panangisuro.” (1 Timoteo 5:17) Wen, saan laeng a maysa a rutina ti trabahoda a panangasaba. Maysa daytoy nga arte nga agkasapulan iti panangpartuat kadagiti pamay-an ti panangisuro. (Colosas 4:6) Nangnangruna a napateg daytoy no mangisursuro kadagiti annak.​—Deuteronomio 6:6, 7; Efeso 6:4.

Gapuna, imburay ni Jehova kadagiti sabsabali ti rag-o nga inyeg kenkuana ti panangparsua. Anian a naparabur a sagut!