Inkeddeng Kadi ti Dios ti Panangliput ni Judas ken ni Jesus?
TI PANANGLIPUT ni Judas Iscariote tinungpalna ti nadibinuan a padto ken impakitana ti nasakbay a pannakaammo ni Jehova kasta met iti Anakna. (Salmo 41:9; 55:12, 13; 109:8; Aramid 1:16-20) Nupay kasta, saan a maikuna a ni Judas a mismo ti intuding wenno inkeddeng ti Dios a mangaramid iti dayta. Impakpakauna dagiti padto a maysa a nasinged a kaam-ammo ni Jesus ti mangliputto kenkuana, ngem saan a nainaganan no siasino kadagiti kaam-ammona. Maminsan pay, ipakita dagiti prinsipio ti Biblia a saan nga inkeddeng ti Dios dagiti tignay ni Judas. Ti pagalagadan ti Dios a dinakamat ti apostol ket: “Dika pulos ipatay a sidadarasudos dagiti imam iti asinoman a tao; dika met mannakiraman kadagiti basol ti sabsabali; taginayonem a nadalus ta bagim.” (1 Timoteo 5:22; idiligyo ti 3:6.) Kas pammaneknek a kayatna a nainsiriban ken umiso ti panangpilina kadagiti 12 nga apostolna, nagpatpatnag a nagkararag ni Jesus iti Amana sakbay nga impakaammona ti pangngeddengna. (Lucas 6:12-16) No inkeddengen ti Dios nga agbalinto ni Judas a mangliliput, saan a maitunos daytoy iti panangiturong ken panangiwanwan ti Dios ket, sigun iti pagannurotan, nakiraman [ti Dios] kadagiti basol nga inaramid [ni Judas].
Gapuna, agparang nga idi mapili kas maysa nga apostol, awan ti masnup a pakakitaan iti puso ni Judas nga agbalinto a mangliliput. Impalubosna a ‘tumanor ti makasabidong a ramut’ ken mangtulaw kenkuana, a nagbanag iti isisiasina ken iti panangawatna, saan nga iti panangiwanwan ti Dios, no di ket iti panangiturong ti Diablo iti panagtakaw ken panangliput. (Hebreo 12:14, 15; Juan 13:2; Aramid 1:24, 25; Santiago 1:14, 15) Idi masinunuon ti kasta nga isisiasi, nabalinan ni Jesus a mismo a basaen ti puso ni Judas ken ipadto ti panangliputna.—Juan 13:10, 11.
Pudno, iti salaysay idiay Juan 6:64, idi naitibkol ti dadduma nga adalan gapu iti sumagmamano a pannursuro ni Jesus, mabasatayo a “manipud idi damo [“manipud idi rugi,” JB] ammo ni Jesus no siasino dagidiay di mamati ken no siasino daydiay mangliputto kenkuana.” Nupay naaramat ti sao a “damo” (iti Griego, ar·kheʹ) idiay 2 Pedro 3:4 a tumukoy iti panangrugi ti panamarsua, mabalin a tumukoy met dayta kadagiti dadduma a tiempo. (Lucas 1:2; Juan 15:27) Kas pagarigan, idi nagsao ni apostol Pedro maipapan iti nasantuan nga espiritu a naiparukpok kadagiti Gentil “a kas ti inaramidna met kadatayo idi damo,” nalawag a saan a ti panangrugi ti panagbalinna nga adalan wenno apostol ti tuktukoyenna no di ket ti maysa a napateg a pagteng iti ministeriona, idi aldaw ti Pentecostes, 33 K.P., ti “damo” a pannakaiparukpok ti nasantuan nga espiritu maipaay iti maysa a panggep. (Aramid 11:15; 2:1-4) Gapuna, makapainteres nga imutektekan daytoy a komento iti Juan 6:64 iti Commentary on the Holy Scriptures (p. 227) ni Lange: Ti ‘damo’ dina kaipapanan ti panangrugi dagiti amin a banag, . . . wenno ti panangrugi ti panaginnammoda [ken Jesus], . . . wenno ti panangrugi ti panangurnongna kadagiti adalanna, wenno ti panangrugi ti Mesianiko a ministeriona, . . . no di ket manipud kadagiti immuna a nalimed a bin-i ti di panamati [a nakaitibkolan dagiti dadduma nga adalan]. Kasta met a manipud pay idi damo ammona no siasino ti mangliputto kenkuana.”—Impatarus ken inedit ni P. Schaff, 1976; idiligyo ti 1 Juan 3:8, 11, 12.