Report Dagiti Manangiwaragawag ti Pagarian

Dagiti Tattao ti Dios Itulnogda ti Bagbagida a Situtulok

JOSE ti naganna, ken maysa a katutubo iti puro ti Chipre. Isut’ maysa kadagiti immuna-siglo a Kristiano a nangilako kadagiti talon ken balbalay tapno makapagabuloy iti kuarta a mangparang-ay ti Kinakristiano. Gapu iti kinamanagayat ken kinaparaburna, napanaganan iti Barnabas, a kaipapananna “Anak ti Liwliwa.”​—Aramid 4:34-37.

Ti kasta a napudno a pannakaseknan kadagiti sabsabali ket kankanayon a pakailasinan dagiti pudno nga agdaydayaw ken Jehova. Kasta met dagiti Saksi ni Jehova ita, kas intampok ti sumaganad a kapadasan manipud iti Solomon Islands.

Nagdaliasat ti maysa a grupo ti nasurok nga 60 a Saksi manipud Australia ken New Zealand a nagturong iti Honiara, ti kabesera ti Solomon Islands iti Guadalcanal. Napanda sadiay tapno tumulong iti panangibangon iti maysa nga Assembly Hall maipaay iti dadakkel a Nakristianuan a panagtitipon. Agarup dua laeng a lawas nga imbangonda ti maysa a patakder nga aglaon iti 1,200!

Iti dayta met laeng a tiempo, pinalubosan dagiti lokal nga autoridad iti bassit nga ili ti Munda, iti puro ti New Georgia, a maaddaan ti kongregasion dagiti Saksi ni Jehova iti lote iti mismo a sentro ti ili. Kayatda ti mangbangon iti Kingdom Hall, maysa a lugar a pagdaydayawan. Ket pudno a kasapulanda dayta. Iti salas ti maysa a bassit a balay a naaramid kadagiti bulong ti paggigimonganda ta awan ti mabalinanda nga aramaten a pagibangon iti maysa a Kingdom Hall.a Ti kaaduan a mangbukel ti kongregasion ket lallakay/babbaket ken masaksakit ken ubbing, ket awan a pulos kadakuada ti addaan kapadasan iti trabaho a panagibangon.

Ag-380 a kilometro ti kaadayona, iti puro ti Guadalcanal, intulnog dagiti Saksi iti siudad ti Honiara ti bagida a situtulok. (Salmo 110:3) Kinunada: “No situtulok dagiti kakabsattayo iti sabsabali a pagilian a mangipatakder iti Assembly Hall para kadatayo iti las-ud ti dua a lawas, no kasta awan duadua a matulongantay dagiti kakabsattayo idiay Munda ken maibangonantay ida ti Kingdom Hall iti las-ud ti dua a lawas.”

Kasta ti napasamak. Maysa nga aldaw dimteng idiay Munda ti maysa a ferryboat a naglaon kadagiti nararagsak ken magagaran a boluntario a Saksi. Okupado amin a lallaki ken babbai, natataengan ken ubbing a nangidissaag kadagiti kargada ket rinugianda ti nagbangon, nga inusarda dagiti kayo, semento, yero a para iti atep, ken dadduma pay a materiales nga immun-una a dimteng idiay Munda.

Di nagbayag kalpasan ti pannakairugi ti trabaho, naputed ti abasto ti danum iti ili gapu iti napigsa a bagyo a napakuyogan iti gurruod ken kimat. Nupay kasta, saan a maysa a di mapagballigian a parikut daytoy. Nagkali dagiti Saksi iti bubon a nangabasto iti danum kabayatan ti panagibangon. Komusta ngay ti taraon para kadagiti amin a trabahador? Saan met a parikut dayta. Napan sadiay dagiti boluntario manipud Honiara nga addaan iti nawadwad a taraon nga impaay dagiti kongregasion idiay Honiara. Nangitugotda pay iti bukodda a paraluto!

Kasla saan a mamati dagiti kaarruba bayat a buybuyaenda ti panagtultuloy ti proyekto. Kinuna ti maysa kadakuada: “Saan a malpas dagiti bambanag ditoy iti las-ud laeng ti sumagmamano nga aldaw. Adu a tawen ti mabusbos.” Maysa pay a kaarruba, a pangulo ti relihion, ti nangamin a ti simbaanna ket narugian a maibangon 20 a tawenen ti napalabas ket saan pay la a nalpas daytoy. Maigidiat iti dayta, ti baro a Kingdom Hall dagiti Saksi ni Jehova idiay Munda ket nalpas iti las-ud laeng ti sangapulo nga aldaw!

[Footnote]

[Dagiti Mapa iti panid 24]

(Para iti aktual a pannakaurnosna, kitaem ti publikasion)

Makin-abagatan a Taaw Pacifico

SOLOMON ISLANDS

Munda

GUADALCANAL

Honiara

[Mapa]

AUSTRALIA

NEW ZEALAND