“Kas Kadagiti Al-aldaw ti Maysa a Kayo”

NASUROK a tallo ribu a tawenen ti napalabas, insurat ni Moises: “Dagiti aldaw ti tawenmi pitopuloda a tawen, wenno agpapan pay gapu iti kinabileg walopulo a tawen; nupay kasta ti laeng sagudayda bannog ken ladingit.”​—Salmo 90:10.

Iti laksid ti irarang-ay ti medisina, ti kaatiddog ti biag ti tao ket kas pay laeng idi kaaldawan ni Moises. Nupay kasta, saan a kankanayon a makondenar dagiti tattao iti kasta nga apagbiit a panagbiag. Iti libro ti Biblia nga Isaias, kinuna ti Dios: “Kas kadagiti al-aldaw ti maysa a kayo kastadanto dagiti al-aldaw ti ilik; ket dagiti pinilik agragsakdanto iti mabayag iti aramid dagiti im-imada.”​—Isaias 65:22.

Ti kayo ti olibo ti maysa kadagiti kaatiddogan ti biagna a kayo kadagiti daga a nadakamat iti Biblia. Ti kayo a nailadawan ditoy ket maysa kadagiti adu a sangaribu-tawennan a kayo ti olibo a narangpaya pay laeng idiay Galilea. Kaanonto nga agbiag iti kasta kapaut dagiti tao? Ilawlawag ti isu met laeng a padto a mapasamakto dayta inton mamarsua ti Dios “kadagiti baro a langlangit ken baro a daga.”​—Isaias 65:17.

Impadto met ti libro nga Apocalipsis ti pannakaipasdek ti “maysa a baro a langit ken maysa a baro a daga”​—maysa a baro a nailangitan a gobierno ken maysa a baro a natauan a kagimongan inton ‘punasen [ti Dios] ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.’​—Apocalipsis 21:1, 4.

Asidegen a matungpal daytoy nadibinuan a kari. Iti kasta, uray pay dagiti aldaw ti maysa a kayo ti olibo agbalinto a kasla maysa laeng a 24-oras nga aldaw. Ket addaantayton iti nawadwad a panawen a mangtagiragsak a naan-anay kadagiti aramid ti im-imatayo.