“Panaglako iti Asin” Idiay Mozambique

NI FRANCISCO COANA, maysa a kameng ti komite iti pagilian ti Mozambique, nangbusbos iti sangapulo a tawen kadagiti “refugee camp.” Isalaysayna ti kapadasanna: “Ammok nga agtalinaedkami ditoy iti sumagmamano a panawen, isu a sinaludsodko iti manangaywan ti sirkito no makapagtultuloyak kas maysa a regular pioneer. Ngem kasanot’ panangipaayko iti umdas a panawen iti ministerio iti publiko, tangay gistay amin nga adda iti kampo ket maysa kadagiti Saksi ni Jehova? Kinunak a mapanak idiay Milange, maysa nga ili a 47 a kilometro ti kaadayona, tapno agsapul kadagiti tao a makasabaan.

“Nupay awan ti opisial a pammalubos iti iruruarmi iti kampo, saan a nainget ti pannakaipaalagad daytoy a paglintegan. Malaglagipko ti ipapanko iti kasamekan, a nagparintumeng, ket nagkarkararag iti pamay-an a panangasaba kadagiti umili iti dayta a lugar. Di nagbayag, sinungbatan ni Jehova.

“Nakasaritak ti maysa a lalaki nga adda bisikletana ken nakitulagak kenkuana. Immanamong a no masukayko ti tallo a kakapat nga ektaria a talonna sakbay ti panagtutudo, itednanto ti bisikletana kas sueldok. Gapuna, binigat a sukayek ti kataltalonanna. Binendisionan ni Jehova daytoy nga urnos, tangay kamaudiananna, naaddaanak iti bisikleta.

“Kas resultana, nabalinak a danonen ti dakkel nga ili ti Milange ken siiepektibo a naitultuloyko ti kinapayunirko iti daytoy nabunga a tay-ak. Yantangay napawilan idi ti trabahomi, kasapulan a mangaramidak iti pamay-an tapno mayasidegko dagiti tattao iti kinapudno. Nakasakibut dagiti libro ken magasin iti badok, kargaak ti sangkabassit nga asin ti maysa a bag ket mapanak aglako iti asin. Imbes nga ilakok daytoy iti 5 meticais, ilakok iti 15 meticais. (No nalaka unay, gatangen amin daytoy dagiti tattao, ket awanton ti asin nga aramatek iti panangasaba!) Kastoy ti pannakisaritak:

“‘Naimbag nga aldawyo! Aglaklakoak iti asin itatta.’

“‘Sagmamano?’

“‘Sangapulo ket lima a meticais.’

“‘Saanen. Nangina unay dayta!’

“‘Wen, umanamongak a nangina. Ngem no pampanunotenyo a nangina daytoy ita, sige aguraykayo agsipud ta nanginnginanton iti masanguanan. Ammoyo kadi a naipadto daytoy iti Biblia?’

“‘Pulos a diak pay nabasa dayta iti Bibliak.’

“‘Wen, adda sadiay. Alaem ti Bibliam, ipakitak kenka.’

“Sarunuen dayta ti panagsasarita a maaramat ti Bibliana, ngem agtalinaed a nakasakibut ti Bibliak iti uneg ti badok. Dakamatek ti Apocalipsis kapitulo 6, maipapan kadagiti nariribuk a kasasaad ken kinakirang ti taraon. No mariknak nga umanamong, iruarko ti [libro a] Ti Kinapudno a Mangiturong iti Biag nga Awan Inggana wenno Good News to Make You Happy ket mairugi ti pormal a panagadal iti Biblia.

“Nagbanag daytoy iti pannakairugik iti maysa a grupo dagiti 15 nga interesado idiay Milange. Ngem di nagbayag, naammuanen dagiti agtuturay ti trabahomi. Maysa nga aldaw, bayat a mangyad-adalak iti Biblia, kellaat a simrek dagiti polis ket tiniliwdakami. Naipankami amin iti lokal a pagbaludan, a pakairamanan dagiti babassit nga ubbing iti pamilia. Kalpasan ti panangbusbosmi iti makabulan sadiay, naisublikami manen amin iti kampo.”

Dagitoy a kapadasan saanna a pinakapuy ti regta dagiti kakabsattayo. Maisupadi iti dayta, ni Francisco ken ti pamiliana, agraman dagiti rinibu a kakabsatda nga adda kadagiti kampo, agdaydayaw ken mangaskasabada itan iti sidong ti nawaya a kasasaad idiay Mozambique.