Ti New World Translation Pinagsiddaawna ti Maysa nga Eskolar
SIGUN iti klasikal nga eskolar a Griego a ni Dr. Rijkel ten Kate, saan a siuumiso ti pannakayulog ti sumagmamano a sasao dagiti Olandes a patarus ti Biblia. Kas pagarigan, idiay Lucas kapitulo 2, masarakantayo ti tallo a nagduduma a Griego a sasao (breʹphos, pai·diʹon, ken pais) a naaramat a mangiladawan kadagiti agsasaruno a tukad ti idadakkel ni Jesus. Addaan nadumaduma a kaipapanan ti tunggal maysa kadagitoy a sasao. Nupay kasta, iti adu a Biblia, dua wenno amin dagitoy a tallo a sasao ket makatikaw a naipatarus nga “ubing.” Ania ti umiso a patarus?
Ilawlawag ni Dr. ten Kate nga iti Lu 2 bersikulo 12, ti Griego a sao a breʹphos, kaipapananna “maysa a kayyanak, wenno maladaga.” Ti pai·diʹon, a naaramat iti Lu 2 bersikulo 27, kaipapananna “bassit nga ubing wenno ubing,” ken ti pais, a masarakan iti Lu 2 bersikulo 43, rumbeng a naipatarus nga “ubing.” “Iti ammok,” insurat ni Dr. ten Kate iti Marso 1993 a ruar ti Bijbel en Wetenschap (Biblia ken Siensia), “awan uray maysa a patarus iti Olandes ti nangyulog iti daytoy a siuumiso, a maikuna, a naan-anay a maitunos iti orihinal a teksto.”
Kamaudiananna, naipakita ken ni Dr. ten Kate ti New World Translation of the Holy Scriptures, a magun-odanen iti 12 a pagsasao, agraman ti Olandes. Aniat’ reaksionna? “Kasta unay ti siddaawko,” kinunana, “ta iti kinaagpaysuanna adda maysa nga Olandes a Biblia a sadiay ti nadumaduma nga usar ti tallo a Griego a sasao a breʹphos, pai·diʹon, ken pais ket siuumiso a nausig.” Impatarus kadi ti New World Translation dagitoy a bersikulo a maitunos iti orihinal a teksto a Griego? “Naan-anay a maitunos,” kuna ni Dr. ten Kate.