Dagiti Napanglaw iti Israel

SAAN a pinanggep ni Jehova nga agsagaba iti kinapanglaw ti asinoman kadagiti Israelita. Naipaayan ti nasion iti tawid a daga. (Numeros 34:2-12) Amin dagiti pamilia ti Israel, malaksid kadagiti Levita, nga immawat iti apagkapullo kadagiti amin nga apit iti daga maipaay iti serbisioda iti santuario, nakiramanda iti dayta a tawid isu nga addaanda iti pangsuporta iti bagbagida. (Numeros 18:20, 21) Natalged dagiti agtagikua iti daga. Impatalged dagiti Linteg ti panagtawid a ti daga ket agtultuloy a tagikuaen ti pamilia wenno tribu a makinkukua iti dayta. (Numeros 27:7-11; 36:6-9; Deuteronomio 21:15-17) Saan a mailako daytoy iti awan patinggana. (Levitico 25:23) Iti tawen ti Jubileo, amin dagiti tawid a daga a nailako ket maisublida kadagiti nainkalintegan nga agtagikua. (Levitico 25:13) Gapuna, nupay binusbos a sibubuslon ti maysa a tao ti sanikuana, ti tawid saanto a mapukaw nga agnanayon iti kaputotanna.

Ti matalek a panangannurot kadagiti linteg ti Dios mabalin a linapdanna koma ti kinapanglaw kadagiti Israelita. (Deuteronomio 15:4, 5) Nupay kasta, no sumukirda, saanda a magun-odan ti pammendision ni Jehova, ket daytoy ti mangiturong iti ipapanglaw maigapu kadagiti didigra a kas ti iraraut dagiti kabusor a soldado ken nakaro a tikag. (Deuteronomio 28:22-25; idiligyo ti Oc-ocom 6:1-6; 1 Ar-ari 17:1; 18:17, 18; Santiago 5:17, 18.) Ti tattao, gapu ta nagbalinda a nasadut (Proverbio 6:10, 11; 10:4; 19:15; 20:13; 24:30-34), managbarbartek, nabuklis (Proverbio 23:21), wenno managbirok iti ragragsak (Proverbio 21:17), papanglawenda ti bagbagida ken dagiti pamiliada. Kalpasanna, mabalin met a tumaud dagiti di mapakpakadaan a kasasaad a mangipalned kadagiti tattao iti kinapanglaw. Ti ipapatay papanglawenna dagiti ulila ken balo. Dagiti aksidente ken sakit mabalin a temporario wenno permanente a lapdanna ti maysa a tao a mangaramid iti nasken a trabaho. Maigapu kadagitoy a rason, maikuna ni Jehova iti Israel: “Ti napanglaw saanto nga agawan iti daga.”​—Deuteronomio 15:11.

Nupay kasta, adut’ naaramidan ti Linteg a nangpalaka iti panangsaranget dagiti napanglaw iti kasasaadda. Kabayatan ti panagani, addaanda iti kalintegan nga agadas iti kataltalonan, kakaykayuan, ken kaubasan, isu a saan a kasapulan a makipalpalamada iti tinapay wenno mapilitan nga agtakaw. (Levitico 19:9, 10; 23:22; Deuteronomio 24:19-21) Ti marigrigat nga Israelita mabalinnat’ umutang a saan a mapaanakan, ket maipakitaan iti espiritu ti kinamanagparabur. (Exodo 22:25; Levitico 25:35-37; Deuteronomio 15:7-10) Tapno mapadur-asna dagiti pinansial a sanikuana, mabalinna a temporario nga ilako ti dagana ken ti mismo a bagina iti pannakaadipen. (Levitico 25:25-28, 39-54) Tapno saan a maparigatan dagiti napanglaw, pinalubosan ida ti Linteg a mangidatag kadagiti saan unay a nangina a daton iti santuario.​—Levitico 12:8; 14:21, 22; 27:8.

Impaalagad ti linteg ti Dios ti agpada a hustisia maipaay kadagiti nabaknang ken napanglaw, nga awan mapaboran gapu iti saadna. (Exodo 23:3, 6; Levitico 19:15) Ngem kabayatan ti pannakatnag ti nasion ti Israel iti di kinamatalek, nagsagaba dagiti napanglaw iti nakaro a pannakairurumen.​—Isaias 10:1, 2; Jeremias 2:34.