Dagiti Sinsilio nga Addaan Nagan ti Dios

MINGMINGANYO dagiti pirak a sinsilio a naipakita ditoy. Dagitoy ket inaramid ti monarka nga Aleman a ni Wilhelm V kabayatan ti panagturayna manipud idi 1627 agingga idi 1637. Iti dayta a panawen, makiramraman idi ti makintengnga nga Europa iti Tallopulo a Tawen a Gubat, ti panagdadangadang dagiti Katoliko ken Protestante. Nakidasig ni Wilhelm V iti Protestante a bunggoy. Tapno adda maaramat iti dakkel a gastos iti dangadang, innalana amin a pirakna ket inaramidna dagitoy a sinsilio.

Makapainteres, dagiti ladawan kadagiti adu a sinsilio ipakitada ti init a napalikmutan iti nagan ti Dios, ni Jehova, iti porma ti Hebreo a Tetragrammaton. Adda met kayo ti palma, a mangipasimudaag iti kinabileg. Iparipirip dayta a ti kayo, nupay pinagirig ti angin, saan a naspak gapu iti pannalaknib ti Dios. Ti Latin a kitikit iti sinsilio ket naglaon iti nagan ni Jehova ken mangyeb-ebkas ti panagtalek iti pannalaknibna.”

Imbes nga umararaw iti pannalaknib ti Dios, pudno nga awan mamaayna ti kasta a pannakaaramat ti nagan ti Dios, ta saan a dumasig ni Jehova iti naranggas a panagdadangadang ti sangatauan. Kinapudnona, ti Tallopulo a Tawen a Gubat saanna a nagun-od ti anamong ti Dios. “Sigun iti naannad a pattapatta,” kuna ti Funk & Wagnalls New Encyclopedia, “saan a nakurkurang ngem kagudua kadagiti tattao nga Aleman ti napapatay kabayatan ti gubat. Di mabilang ti kaadu dagiti siudad, ili, purok, ken kataltalonan iti Alemania ti naan-anay a nadadael. Agarup dua a kakatlo kadagiti pasilidad ti industria, agrikultura, ken komersio ti Alemania ti nadadael.”

Ti pannakaaramat ti nagan a Jehova kadagitoy a sinsilio ipalagipna ti bilin a naited iti Israel: “Dika aramaten iti barengbareng ti nagan ni Jehova a Diosmo.” (Exodo 20:7) Nupay kasta, paneknekan dagitoy a sinsilio a ti nadiosan a nagan, Jehova, ket nabayagen a pagaammo dagiti tattao idiay Alemania. Kasanot’ kauneg ti pannakaam-ammoyo iti Dios a makinnagan iti dayta?