Ti Kadi Dios ti Agturay iti Lubong?

AGSAPA iti Domingo. Adu a tattao ti bumangon, agpelles, mamigat, ken sidadaras nga agturong iti simbaan. Sadiay agimdengda iti maysa a sermon no kasano a katan-okan nga agturturay ti Dios iti intero a daga, a di maartapan iti autoridad. Naibaga kadakuada nga isut’ maseknan unay kadagiti tattao. Madakamat met ni Jesu-Kristo. Mabalin a mangngegda nga isut’ Ari dagiti ar-ari a kenkuana isuamin a tumeng agparintumeng kas panagtulnog.

Apagsangpetda manipud iti simbaan, mabalin a luktan dagitoy a tattao ti telebision ken agbuya iti damdamag. Ita, mangngegyo ti maipapan iti panagbisin, krimen, panagabuso iti droga, kinapanglaw. Ken makitada dagiti makapaladingit a buya ti sakit ken ipapatay.

Mabalin a mangrugi nga agpanunot ti kakasta a tattao kadagiti banag a nangngegda iti simbaan ken nangnangruna kadagiti banag a pulos a di man la nailawlawag sadiay. No naayat ken mannakabalin-amin ti Dios, apay a mapaspasamak dagiti makapasidduker a bambanag? Ket ni met ngay Jesu-Kristo? Nabatad, nakaad-adu a tumeng ti di agparintumeng kas panagtulnog kenkuana.

[Ladawan iti panid 3]

No ti Dios ti agturturay iti lubong, apay nga adda kasta a panagsagaba ken riribuk?

[Picture Credit Line iti panid 2]

Akkub: Ladawan ti NASA