Aniat’ Ipalgak ti Sarming?

AGSARMINGKAYO. Aniat’ makitayo? No dadduma, ti itataldiap iti sarming mangipalgak iti langayo iti nakababain a pakapilawan ket siraragsakkayo a mangatur sakbay a madlaw dayta ti sabsabali.

Ti Biblia ket kas maysa a sarming. Tulongannatay a maaddaan iti napudno a panangbigbig iti bagbagitayo, a mangatipa kadatayo nga agpanunot iti nalablabes​—wenno nakabasbassit​—maipanggep iti kinapategtayo iti imatang ti Dios. (Mateo 10:29-31; Roma 12:3) Maysa pay, maipalgak ti Biblia dagiti pakapilawan iti sasao, aramid, wenno kababalin a kasapulan a palintegentayo. No mapasamak daytoy, baybay-anyo kadi no aniat’ ipalgak ti sarming?

Kunaen ti mannurat iti Biblia a ni Santiago: “No ti asinoman managdengngeg iti sao, ket di managaramid, daytoy a maysa umasping iti tao a kitkitaenna ti nakaisigudan a rupana iti maysa a pagsarmingan. Ta kitaenna ti bagina, ket isu mapan ket dagus a malipatanna no ania ti kitana a tao.”​—Santiago 1:23, 24.

Maisupadi, iladawan ni Santiago ti sabali a tao, daydiay “mangsukimat iti perpekto a linteg a kukua ti wayawaya ken agtultuloy iti dayta.” (Santiago 1:25) Ti Griego a sao a naipatarus kas “mangsukimat” kaipapanannat’ umasideg a naimbag wenno agrukob a mangkita. “Nakarkaro pay ngem iti itataldiap ti pagpapatangan,” kuna ti Theological Dictionary of the New Testament. Ti sao mangipasimudaag iti naannad a panangsukimat iti nailemmeng a banag. “Adda banag a napateg a kayat a makita ti managbuya, nupay narigat para kenkuana a kitaen ken tarusan ti kaipapananna nga insigida,” insurat ti komentarista iti Biblia a ni R. V. G. Tasker.

No kasta, sukimatenyonto aya ti bagiyo iti sarming ti Sao ti Dios ken itunos iti kalikagumanna? Ituloy ni Santiago: “Daytoy a tao, agsipud ta isu nagbalin, saan a maysa a mananglipat a managdengngeg, no di ket maysa a managaramid iti trabaho, naragsakto iti panangaramidna iti dayta.”​—Santiago 1:25.