‘Kas iti Landok Patademenna ti Landok’

ITI ngudo ti maikatlo a siglo K.P., immadayo ti maysa a napasnek nga agtutubo a lalaki nga agnagan Anthony, a nadeskribir kas “Coptic a Kristiano,” iti lubong ket nagbukbukod iti disierto iti las-ud ti 20 a tawen. Apay? Impagarupna a daytoy ti kasayaatan a pamay-an para kenkuana tapno makapagserbi iti Dios. Isut’ kaunaan a nabileg nga ermitaño ti Kakristianuan.

Itatta, manmano dagiti ermitaño iti Kakristianuan. Ngem umad-adu dagiti agbukbukod iti sabali a pamay-an. Saanda a kayat ti makisarita iti sabsabali maipapan iti relihion, iti panangipagarupda nga amangan ta ti kasta a pannakisarita ket agtungpal iti di panagtutunos ken panagririri. Ti panagdaydayawda ket buklen kangrunaanna ti di panangdangran iti kaarrubada.

Pudno, ti di panangdangran iti kaarruba ket maysa a paset ti pudno a relihion, ngem saan la a dayta ti kasapulan. Kuna ti nagkauna a proverbio: “Ti landok patademenna ti landok. Kasta met ti tao patademenna ti langa ti gayyemna.” (Proverbio 27:17) Iti kinapudnona, paregtaen ti Biblia dagiti Kristiano nga agtataripnong, a saan ket a naan-anay nga isinada ti bagbagida iti lubong wenno iti dadduma a Kristiano. (Juan 17:14, 15) Kunana: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa.” (Hebreo 10:24, 25) Sursuroten dagiti Saksi ni Jehova dayta a balakad. Sumagmamano a daras iti makalawas, agtataripnongda tapno ‘mapatadem ti langa ti sabali,’ a paregtaenda ti pammati dagiti kapammatianda. Makitada a ti sipapanayag a panagsasarita maipapan iti Biblia saan a mangiturong iti riri. Imbes ketdi, mangiturong dayta iti panagtutunos ken kappia. Dayta ket maysa a nagpateg a paset ti pudno a panagdaydayaw.