Dagiti Saksi ni Jehova iti Aglikmut ti Lubong—New Zealand
MABALINAN kadi dagiti puro nga idayaw ni Jehova? Wen, sigun iti Isaias 42:10: “Ikantaanyo ni Jehova iti maysa a baro a kanta, ti dayawna manipud iti pungto ti daga, . . . dakayo a purpuro ken dakayo nga agnanaed kadakuada.” Awan duadua a dagiti puro a mangbukel iti New Zealand ket idaydayawda ni Jehova. Agdindinamag iti lubong gapu kadagiti danaw, fjord, nangangato a bambantay, glacier, aplaya, napuskol a kabakiran a naarkosan kadagiti fern, ken naraber a pagpaaraban, sibabatad nga ipakita ti New Zealand ti kinadayag ken kinatan-ok ti Namarsua iti langit ken daga.
Sipud pay idi apagtapog ti [maika-20 a] siglo, umadu nga umadu dagiti agnanaed idiay New Zealand ti nangitipon kadagiti timekda a mangidayaw ken Jehova babaen ti iyaadanida kenkuana iti nasin-aw a panagdayaw ken panangiburay iti naimbag a damag ti Pagarian ti Dios kadagiti sabsabali. Itay nabiit, inkeddeng ti maysa a Saksi a nakangngeg iti nasayaat a kapadasan maipapan iti panangasaba kadagiti kabagian a kasabaanna ti pamiliana. Nangisagut kadagiti kopia ti libro a Mabalinyo ti Agbiag nga Agnanayon iti Paraiso a Daga iti adu a kameng ti pamilia. Ti resultana? Impadamagna nga agad-adalen iti Biblia ti maysa a kabsat a babai ken lalaki, nabautisaranen kas maysa kadagiti Saksi ni Jehova ti maysa a kaanakan a lalaki, ket ad-adda itan ti panangipangag dagiti sabsabali pay iti kinapudno ti Sao ti Dios. Isut’ addaan pay laeng iti nalawa a tay-ak a pagtrabahuan; malaksid pay kadagiti nagannakna, addaan iti innem a kakabsat a lallaki ken siam a kakabsat a babbai!
Mangibunga met iti pannakaidayaw ni Jehova no agtitinnulong dagiti Saksi a mangibangon kadagiti Kingdom Hall. Kas pagarigan, insurat ti kolumnista ti warnakan a ni Roy Perkins iti Opotiki News a Mayo 17, 1994: “Kas maysa a di-manamati, nasdaawak unay iti trabaho ken panangikagumaan dagiti amin a napasnek a trabahador a nangbusbos iti adu unay a tiempo ken panagregget iti proyekto gapu iti panagayat iti Diosda.
“Kadagitoy amin nga oras a panagtrabaho iti ngudo ti lawas pulos a diak nakakita wenno nakangngeg iti uray maysa a reklamo . . . Umuli dagiti babbai iti andamio a makipagtrabaho kadagiti lallaki, agmasa, agipangato, agbagkat, a naganaygay ken naragsakda amin.
“Awan trabahador a nangsayang iti panawen ti trabaho iti panagsigarilio. Kadagiti amin a tattao nga agtartrabaho iti aniaman, saan a narugitan ti angin malaksid iti sumagmamano a sengngaw ti pinta ken tapok ti ladrilio.”
Nagsurat ti bagi dagiti panglakayen iti Kongregasion ti Opotiki: “Ti intero a proyekto pinagsiddaawna unay dagiti umili. Kasla isu daytat’ pagsasaritaan ti isuamin. Nairugi ti adu a panangyadal iti Biblia. Ti ad-adda a nakitami a makaparagsak unay ket maipapan iti maysa a pagassawaan a napalalo a relihioso, nga adun a tawtawen a kiniddawda a dikam mapmapan kadakuada. Immayda nga inaldaw iti lugar a pagibangonan sa iti gimong. Kinuna ti asawa a lalaki kalpasanna, ‘Makitak a tattaonakayo ti Dios. Iti un-unegko, nabayagen a tartarigagayak ti makitimpuyog iti tattao a kas kadakayo.’”
Iti kallabes a tawen, kinuna ti kolumnista iti Otago Daily Times maipapan iti napartak ti pannakaibangonna a Kingdom Hall idiay Dunedin: “Maysa dayta a nakaskasdaaw a gapuanan, nakaskasdaaw a pagarigan ti pakatignayan ken panagtitinnulong.” Kinuna ti isu met laeng a warnakan: “Dagiti tattao iti siudad binuyada buyogen ti panagsiddaaw ti pannakabangon ti dakkel a pasdek iti imatangda, ket adu la ketdi ti mangpampanunot no aniat’ dadduma pay a panagbalbaliw ken positibo a proyekto a mairingpas no adda kasta nga umasping a dakkel a timpuyog ti boluntario a trabaho ken nabuslon nga espiritu ti panagtutunos. Ti Kingdom Hall ket maysa a maipagpannakkel a simbolo ti nabunga a makagunggona a panagregget.”
Kadagiti ginasut a simmarungkar iti lugar a pagibangonan, napaliiw ti maysa a lalaki nga agipatpatakder dagiti Saksi kadagiti “simbaan” idinto ta ilaklako ida ti relihionna gapu iti bumasbassit a miembro. “No nakapaguraykayo pay koma iti agarup sangapulo ket dua a bulan, nagatangyo koma ti maysa kadagiti simbaanmi,” kinunana. “Kasapulan nga ilakomi ti maysa gapu ta dikam makabayad. Ngem, siempre, awanankayo kadagiti matangdanan a klero. . . . Sa nalaka ti pangmentenar kadagiti pasdekyo, saan a nangangato a pasdek nga addaan kadagiti tirad nga imposible a mamentenar.”
Nalawag, pudno a dagiti puro maidayawda ti Dios. Sapay koma ta agtultuloy nga agallungogan ti pannakaidaydayaw ni Jehova iti daytoy nagpintas a daga ti Pacifico—ken iti aglikmut ti lubong!
[Kahon iti panid 9]
KASASAAD TI PAGILIAN:
1994 Tawen Serbisio
KANGATUAN A BILANG TI MANGASKASABA: 12,867
RATIO: 1 a Saksi iti 271
TIMMABUNO ITI MEMORIAL: 24,436
PROMEDIO DAGITI AGIBUMBUNANNAG A PAYUNIR: 1,386
PROMEDIO DAGITI PANAGADAL ITI BIBLIA: 7,519
BILANG TI NABAUTISARAN: 568
BILANG DAGITI KONGREGASION: 158
SANGA NGA OPISINA: MANUREWA
[Ladawan iti panid 9]
Dagiti payunir a mapan iti tay-ak idi agarup 1930
[Ladawan iti panid 9]
Dagiti pasilidad ti sanga idiay Manurewa
[Ladawan iti panid 9]
Panangaskasaba iti mensahe ti Pagarian idiay Devonport, Auckland