Naikeddeng ti Kaso Maibusor Kadagiti Saksi ni Jehova

KALPASAN ti maulit-ulit a panangitantan, kamaudiananna nagtitipon ti Court of Appeals idiay Tesalonica, Grecia, idi Hunio 8, 1995, tapno denggenda ti kaso maibusor kadagiti uppat a babbai a Saksi ni Jehova. Ti nakaidarumanda? Proselitismo, nga impawil ti linteg ti Grecia iti nasuroken a lima a dekada.

Nupay kasta, idi nagtataripnong ti korte, natayen ti kangrunaan a testigo iti darum​—ti padi a nangyuli iti kaso maibusor kadagiti uppat a babbai. Inkagumaan ti sabali a padi nga isut’ sumukat nga agtestigo, ngem saan nga inawat ti korte ti kiddawna. Gapuna, di ngad pakasdaawan a nagpaut laeng iti 15 a minuto ti panagdengngeg! Inusig ti hues ti dadduma pay a testigo iti darum ket natakuatan a saan a nakabasol dagiti naidarum iti maiparit a proselitismo. Ipamatmat daytoy a pangngeddeng a situtulok dagiti korte a Griego a mangraem ken makitunos iti pangngeddeng nga impaulog ti European Court of Human Rights idi 1993.

Nangnangruna a makapasiddaaw ti pannakakita kadagiti tallo a babbai a nagtestigo iti darum nga immasideg kadagiti naidarum a Saksi, a naimpusuan a nangkablaaw kadakuada. “Dispensarendakam koma kadagitoy amin a banag a napasamak,” kinuna ti maysa kadakuada. Kinunana pay: “Saan a dakami ti makimbasol. Pinilitnakami ti padi a mangidarum kadakayo. Ita ta natayen, kayatmi nga umaykayo iti purokmi ken kadagiti pagtaenganmi.”

Gapuna, impaayan manen ni Jehova ti nakaskasdaaw a balligi ti ilina idiay Grecia. Naipaulog dagiti linteg ti proselitismo idiay Grecia idi 1938 ken 1939. Idi 1993, inkeddeng ti European Court of Human Rights a di umiso ti panangaramat iti daytoy a linteg a mangidadanes kadagiti Saksi ni Jehova.​—Kitaenyo Ti Pagwanawanan, Setiembre 1, 1993, pinanid 27-31.