Pammati ti Nangtignay Kenkuana

IDI tinudingan ni Jehova ni Moises nga idauluanna ti nasion ti Israel tapno makaluk-at iti panangadipen dagiti Egipcio, iti damo nagpakpakaasi ni Moises, a kunkunana: “O, Jehova, saanak a tao a sumasao, uray idi nalabes a tiempo wenno ita ken uray nanipud idi nakisaoka itoy adipenmo, ta naullayatak nga agsao ket natabbed ti dilak.” (Exodo 4:10) Wen, saan a narikna ni Moises nga isut’ kualipikado iti kasta a nadagsen a trabaho.

Kasta met ita, adu kadagiti adipen ni Jehova ti makarikna no dadduma a dida kabaelan nga itungpal ti rebbengen a naited kadakuada. Kas pagarigan, isalaysay ti maysa a Kristiano a manangaywan nga agnagan Theodore: “Iti amin nga impaaramid kaniak ni Jehova, ti panagserbi iti tay-ak ti karirigatan. Idi agtutuboak pay, dagus nga umasidegak iti ruangan, a kampay idi agtimbreak sa siuulimek a pumanaw, a mangnamnama nga awan makangngeg wenno makakita kaniak. Idi nagmataenganakon, diakon inaramid dayta, ngem paglaladutennak ti panangpanunotko iti panagbalaybalay. Uray ita, aglaladutak sakbay a mapanak iti ministerio, ngem mapanak latta.”

Aniat’ timmulong ken Moises ken kadagiti moderno-aldaw a Saksi a kas ken Theodore a mangsaranget iti kakasta a panagbuteng? Sumungbat ti Biblia: “Babaen iti pammati pinanawanna [ni Moises] ti Egipto, . . . ta isu nagtultuloy a natibker a kasla kitkitaenna daydiay Maysa a di makita.”​—Hebreo 11:27.

Kinapudnona, babaen ti panangalagad ti pammati ken Jehova, napagballigian ni Moises ti nariknana a kinaawan-gaway ken tinungpalna dagiti naituding a rebbengenna kas ukom, mammadto, pangulo ti nasion, manangibabaet iti Linteg ti tulag, komander, historiador, ken mannurat ti Biblia.

Kasta met, no adda pammatitayo a kas ken Moises, magnatayo nga arigna ‘kitkitaentayo daydiay Maysa a di makita.’ Ti kasta a pammati mangyeg iti tured, a tulongannatayo a mangibaklay kadagiti Nakristianuan a rebbengentayo​—uray no mabalin a mariknatayo a ditay kabaelan.