Malagipyo Pay Aya?

Inapresiaryo kadi ti panangbasa kadagiti nabiit pay a ruar ti Pagwanawanan? Bueno, kitaenyo no masungbatanyo dagiti sumaganad a saludsod:

◻ Ti kadi sasao ni Jesus a, “No pakawanenyo ti basbasol dagiti asinoman a tattao, napakawandan,” kayatna a sawen a makapakawan dagiti Kristiano kadagiti basol? (Juan 20:23)

Awan Nainkasuratan a pakaibatayan iti panangikuna a dagiti Kristiano iti sapasap, wenno uray dagiti nadutokan a panglakayen iti kongregasion, ti addaan iti nadiosan a kinaturay a mangpakawan kadagiti basol. Ti konteksto ti sasao ni Jesus kasla ipakitana a naipaay kadagiti apostol babaen ti panagtignay ti espiritu iti naisangsangayan nga autoridad a mangpakawan wenno di mangpakawan kadagiti basol. (Kitaenyo ti Aramid 5:1-11; 2 Corinto 12:12.)​—4/15, panid 28.

◻ Aniat’ naisangsangayan iti patarus ni J. J. Stewart Perowne iti libro dagiti Salmo, nga immuna a naipablaak iti 1864?

Iti patarusna inkagumaan ni Perowne a suroten a “siaannad ti porma ti Hebreo, agpadpada iti gramatikana ken iti pakabuklan dagiti sasao.” Iti panangaramid iti kasta inanamonganna ti pannakaisubli ti nasantuan a nagan iti porma a “Jehovah.”​—4/15, panid 31.

◻ Ania a panangiwanwan ti impaay ni Jesus kadagiti pasurotna no maipapan iti pannakilangenda kadagiti gobierno iti lubong?

Kinuna ni Jesus: “Ibayadyo ken Cesar dagiti bambanag ni Cesar, ngem iti Dios dagiti bambanag ti Dios.” (Mateo 22:21) Kinunana pay: “No ti asinoman iti sidong ti kinaturay pilitennaka nga agserbi iti maysa a milia, kumuyogka kenkuana iti dua a milia.” (Mateo 5:41) Iladladawan ditoy ni Jesus ti prinsipio ti natulok a panagpasakup kadagiti legal a makalikaguman, kadagiti relasion man iti tao wenno kadagiti pagannurotan ti gobierno a maitunos iti linteg ti Dios. (Lucas 6:27-31; Juan 17:14, 15)​—5/1, panid 12.

◻ Aniat’ kaipapananna ti ‘pannagna iti kinapudno’? (Salmo 86:11)

Ramanen daytoy ti panagtulnog kadagiti pagannurotan ti Dios ken panagserbi kenkuana buyogen ti kinamatalek ken kinapudno. (Salmo 25:4, 5; Juan 4:23, 24)​—5/15, panid 18.

◻ Aniat’ naibanag iti panangibaon ni Jehova ken ni Jonas idiay Nineve?

Kas nagbanagan dagiti bambanag, impakita ti trabaho a panangasaba ni Jonas idiay Nineve ti pagdumaan dagiti managbabawi a taga-Nineve ken dagiti nasubeg nga Israelita, a nakaro ti kinaawan pammati ken kinapakumbabada. (Idiligyo ti Deuteronomio 9:6, 13; Jonas 3:4-10.)​—5/15, panid 28.

◻ Asino ti Serpiente ken asino ti “babai” a nadakamat iti Genesis 3:15?

Ti Serpiente ket saan a ti mismo nga uleg no di ket daydiay nangaramat iti dayta, ni Satanas a Diablo. (Apocalipsis 12:9) “Ti babai” ket saan a ni Eva no di ket ti nailangitan nga organisasion ni Jehova, ti ina dagiti napulotan iti espiritu nga adipenna ditoy daga. (Galacia 4:26)​—6/1, panid 9.

◻ Kasano a makaruar ti maysa a tao iti Babilonia a Dakkel ket makasarak iti kinatalged? (Apocalipsis 18:4)

Masapul a naan-anay nga isinana ti bagina manipud kadagiti ulbod a narelihiosuan nga organisasion ken kasta met kadagiti kaugalianda ken ti espiritu a patanorenda, sa kalpasanna rumbeng a sapulenna ti kinatalged iti uneg ti nateokratikuan nga organisasion ni Jehova. (Efeso 5:7-11)​—6/1, panid 18.

◻ Apay a masansan a nadakamat ti agila iti Kasuratan?

Insingasing dagiti mannurat ti Biblia dagiti galad ti agila a mangisimbolo iti kakasta a banag kas ti kinasirib, nadiosan a pannalaknib, ken kinasiglat.​—6/15, panid 8.

◻ Dagiti kadi adipen ti Dios ita nga addaan naindagaan a namnama addaanda iti isu met laeng a kaadu ti espiritu ti Dios a kas kadagiti napulotan iti espiritu a Kristiano?

Iti kinapudnona, ti sungbat ket wen. Magun-od ti espiritu ti Dios iti agpada a kaadu iti dua a klase, ket ti pannakaammo ken pannakaawat agpadpada a magun-odanda, nga addaan kadagiti agpada a gundaway a mangagsep iti dayta.​—6/15, panid 31.

◻ Apay a makagunggona kadatayo ita a sukimaten ti sagrado a panagserbi nga inaramid dagiti padi iti Israel iti templo idiay Jerusalem?

Iti panangaramid iti kasta maapresiartay nga ad-adda ti naasi nga urnos nga iti dayta dagiti managbasol a tao ita maikappiada iti Dios. (Hebreo 10:1-7)​—7/1, panid 8.

◻ Kasano a naaddaan iti dakdakkel a dayag ti maikadua a templo a naibangon idiay Jerusalem ngem iti daydiay imbangon ni Solomon?

Napapaut ti maikadua a templo iti 164 a tawen ngem ti templo ni Solomon. Ad-adu a managdayaw manipud iti ad-adu pay a daga ti nagdudupudop kadagiti paraanganna. Napatpateg pay, tinagiragsak daytoy maikadua a templo ti dakkel a nakaidumaan ti kaadda kenkuana ti Anak ti Dios, ni Jesu-Kristo, a nangisuro iti paraanganna.​—7/1, pinanid 12, 13.

◻ Kaano nga inyeg ti Dios ti naespirituan a templona?

Naaramid daytoy idi 29 K.P. idi impakita ti Dios ti iyaanamongna iti kararag ni Jesus maipaay iti bautismo. (Mateo 3:16, 17) Ti iyaanamong ti Dios iti pannakaidatag ti bagi ni Jesus kaipapananna nga, iti naespirituan nga anag, naadda ti maysa nga altar a dakdakkel ngem iti daydiay naaramat iti Jerusalem.​—7/1, pinanid 14, 15.

◻ Apay a rumbeng a manangpakawantayo?

Ti panangpakawan iti agbasol a nagpadispensar ket nasken no kayattay a taginayonen ti Nakristianuan a panagkaykaysa. Ti panagbinnusor ken panangimula iti sakit ti nakem ikkatenna kadatayo ti talna ti panunot. No agbalintay a di manangpakawan, agpegpeggadtayo nga iti masanguanan nga aldaw dinto pakawanen ni Jehova dagiti basoltayo. (Mateo 6:14, 15)​—7/15, panid 18.

◻ Kasano nga agbalin a nasantuan dagiti Israelita?

Posible laeng ti kinasanto babaen ti pannakaaddat’ nadekket a relasionda ken Jehova, ti nasantuan a Dios, ken babaen ti nasin-aw a panagdayawda kenkuana. Kasapulanda ti umiso a pannakaammo iti daydiay “Kasasantuan” tapno makapagdayawda kenkuana iti kinasanto, iti pisikal ken naespirituan a kinadalus. (Proverbio 2:1-6; 9:10)​—8/1, panid 11.