Usigen Dagiti Espesialista Dagiti Sandi ti Dara

AGARUP 200 nga espesialista iti aglikmut ti Estados Unidos ti nagtataripnong idiay Cleveland, Ohio, idi Sabado, Oktubre 7, 1995, tapno pagsasaritaanda ti tema a paginteresan unay iti tay-ak ti medisina: ti awanan dara a panangagas ken panagopera.

Napagsasaritaan ti sumagmamano a naririkut a kasasaad. Kas pagarigan, kasanon no agsagsagaba ti pasiente iti nakaro nga anemia? Kasano a maagasan nga awan dara ti maysa a maladaga a nasapa unay a nayanak? Maopera kadi a sibaballigi ti puso nga awan panangyalison? Makapainteres, ti panagopera nga awanan dara​—masansan nga agusar kadagiti pamay-an a tumulong iti bagi a mangpaadu iti bukodna nga abasto a dara​—ti naaramiden kadagitoy amin a kasasaad nga addaan kadagiti nasayaat a resulta.a

Apay a kasapulan dagiti sandi ti panangyalison iti dara? “Naammuanmi a dagiti panangyalison iti dara masansan a mangyakar kadagiti sakit, nangruna ti hepatitis,” kuna ni Sharon Vernon, direktor ti Center for Bloodless Medicine and Surgery iti St. Vincent Charity Hospital idiay Cleveland. Kunana pay: “Uray saan a mangyakar ti dara iti impeksion malapdanna ti panagandar ti resistansia ti pasiente.” Nupay napabassit ti pannakaiyakar ti AIDS gapu iti pannakasukimat ti dara, adu pay laeng ti saksakit a di nakita ti kakasta a panangsukimat. Ken iti laksid ti panagkasapulan iti dakdakkel a panagsagana, ti awanan dara a panagopera napaneknekan a naek-ekonomia kadagiti ospital, tangay pukawenna dagiti legal a parikut a mabalin nga ibungana no mayalisonan dagiti pasiente iti namulitan a dara.

Kadagiti Saksi ni Jehova, adda pay napatpateg a rason iti panangliklik a mangipauneg iti dara: iparit dayta ti linteg ti Dios. (Aramid 15:29) Kaskasdi, kayatda nga awaten ti posible a kasayaatan a pannakaagas. Gapuna, nakitinnulongda kadagiti doktor a mangidadaulo iti panagsirarak iti awanan dara a panangagas. Ti kasta a panangagas saanna laeng a gunggonaan dagiti Saksi ni Jehova no di pay ket dagiti adu a sabsabali pay a maseknan maipapan kadagiti peggad ti panangyalison iti dara.

[Footnote]

[Picture Credit Line iti panid 32]

WHO rinetrato ni P. Almasy