Ti Sarsarita Maipapan iti Layus Suportaranna ti Salaysay ti Biblia

TI SANGALUBONGAN a Delubio idi kaaldawan ni Noe ket pudno a pasamak iti historia. Dagiti bersion maipapan iti salaysay ket masarakan iti sarsarita ti adu a nagduduma a sibilisasion iti aglikmut ti lubong. Iti pagilian a Chad iti Africa, kastoy ti panangilawlawag ti tribu a Moussaye maipapan iti Layus:

‘Idi un-unana, iti adayo a lugar, adda agnanaed a maysa a pamilia. Maysa nga aldaw, kayat ti ina daytoy a pamilia ti mangisagana iti naimas a taraon para kadagiti ay-ayatenna. Gapuna innalana ti alsong ken al-ona tapno baywenna ti bukbukel a pagbalinenna a bellaay. Nababbaba idi ti tangatang ngem ita. Kinapudnona, no gaw-atenyo, maiggamanyo dayta. Binayona ti bukbukel buyogen ti amin a pigsana, ket ti bukbukel a binayona dagus a nagbalin a bellaay. Ngem kabayatan a nagbayo, awan annadna a naitag-ay ti babai ti al-o iti nangato unay, ket naabutanna ti tangatang! Madagdagus, nangrugi nga agtinnag iti daga ti adu a danum. Saan la a gagangay a tudo daytoy. Nagtudo iti pito nga aldaw ken pito a rabii agingga a natinep ti intero a daga iti danum. Bayat a nagtudo, nangrugi nga agpangato ti tangatang agingga a naisaad iti ayanna ita​—di madanon ti kinangatona. Anian a didigra iti sangatauan! Sipud idin, napukawtay ti pribilehio a mangsagid iti tangatang.’

Makapainteres, masarakan iti intero a lubong dagiti nagkauna a salaysay maipapan iti sangalubongan a layus. Dagiti katutubo a sibilisasion iti America kasta met dagiti Immuna [a tattao] iti Australia addaanda amin iti sarsarita maipapan iti dayta. Nadumaduma dagiti detalye, ngem kaaduan kadagiti salaysay addaan kapanunotan a ti daga ket natinep iti danum ken sumagmamano laeng a tattao ti nakalasat iti barko nga inaramid ti tao. Ti kinasaknap ti kastoy a tema ket kanayonan a mangsuporta iti banag a talaga a napasamak ti maysa a sangalubongan a Delubio, kas nailanad iti Biblia.​—Genesis 7:11-20.