Kaitungpalan ti Padto iti Biblia
MAKITA iti Imperial War Museum idiay London, England, ti maysa a naisalsalumina a relo ken maysa nga electronic digital counter. Bayat nga agrikrikus ti relo, aglitek ti counter kada 3.31 segundo. Iti tunggal litek sabali pay a numero ti mainayon iti pakadagupanna. Tunggal litek, tunggal numero, irepresentarna ti maysa a lalaki, babai, wenno ubing a natay kas resulta ti gubat iti daytoy a siglo.
Rinugian ti counter ti panagkuentana idi Hunio 1989 ket manamnama a makompleto ti kuenta iti tengnga ti rabii ti bisperas ti tawen 2000. Iti dayta a panawen ti numero iti counter ket mangirekord iti sangagasut a milion—ti napattapatta a bilang dagiti ipapatay kas bunga ti gubat iti intero a maika-20 a siglo.
Gistay 2,000 a tawenen ti napalabas, impadto ni Jesu-Kristo ti maysa a panawen a namarkaan babaen iti ‘nasion a tumakder a maibusor iti nasion ken pagarian maibusor iti pagarian.’ Maitunos iti daytoy, nabayagen nga ikaskasaba dagiti Saksi ni Jehova a dagiti makadadael a gubat iti daytoy a siglo, agraman ti adu a ginggined, angol, kinakirang ti taraon, ken dadduma pay a pasamak, siraragup a mangpaneknek nga agbibiagtayo kadagiti “maudi nga al-aldaw”—ti periodo ti tiempo a simmaruno iti pannakaitrono ni Kristo kas Ari idiay langit idi tawen 1914.—Lucas 21:10, 11; 2 Timoteo 3:1.
Iti panangaramat iti Biblia kas autoridadna, iwarwaragawag ti Pagwanawanan ti naimbag a damag nga iti asidegen dadaelento ti Pagarian ti Dios dagiti manangirurumen ken pagbalinenna a paraiso ti daga. Ket ti met ngay masanguanan ti panaggugubat? Kuna ti Biblia: “Umaykayo, imatanganyo dagiti ar-aramid ni Jehova, no ania dagiti panangdadael nga inaramidna ditoy daga. Pagsardengenna dagiti gubgubat inggana iti ungto ti daga. Rungrungduenna ti ba-i ti pana ket gupdenna a maminpinsan ti gayang; puoranna dagiti luglugan [a pakigubat] iti apuy.”—Salmo 46:8, 9.
[Picture Credit Line iti panid 32]
Relo: Iti pammalubos ti Imperial War Museum