Ti Magasin a Mangtukay iti Puso
ADU a magasin ti maipabpablaak iti aglikmut ti globo a mangpennek iti bisin dagiti managbasa iti impormasion wenno paglinglingayan.
Aniat’ mangiduma unay iti magasin nga iggemyo? Ti nairagpin a surat, a naawat ti sanga nga opisina ti Watch Tower Society idiay Alemania, isut’ mangipaay iti sungbat:
“Agyamanak unay, patgek a kakabsat, kadagiti panangikagumaan ken trabahoyo. Idi naggapukami iti gimong a kaduak ti dua nga annakko a lallaki, nupay alas 9:30 t.r., dinengngegko laeng ti kaudian a Pagwanawanan [iti audiocassette]. Bayat nga in-innawak dagiti pinggan, rinugiak a denggen ti umuna nga artikulo a maadal (Abril 1, 1995). Nariknak a kasapulan a denggek pay iti maminsan, gapuna insardengko ti trabahok iti kosina ket binasak ti artikulo a [“Napategkayo iti Imatang ti Dios!”] iti Pagwanawanan a kagiddan ti tape. Natukayna ti pusok, nangnangruna ti maikapat ken maikalima a parapo. Kalpasanna nangrugin nga agarubos dagiti lua—ngem apagbiit laeng. Agyamanak ken Jehova ta sibibiagak ken karamanak iti ilina ken maipakaammok ti naganna, a kaduak ti adu a sabsabali pay. Talaga nga awan rason tapno mariknatay ti kinaawan mamaayna. Tumultulong ti espiritu ni Jehova iti ilina. Sapay koma ta makapagibturtay amin ken makapagtakder a natibker iti pammati, kas nagkaykaysa. Buyogen ti Nakristianuan nga ayat, toy kabsatyo iti pammati.”
Saan laeng nga impormasion ti ipapaay Ti Pagwanawanan. Tukayenna ti puso dagiti managbasana ken penkenna ti tarigagayda iti naespirituan a taraon ken naintiempuan a pammaregta. Wen, mangipapaay Ti Pagwanawanan iti ‘taraon iti umiso a tiempo.’—Mateo 24:45.