“Agkakapamiliatayo Amin”
KADAGITI kallabes a tawen nagsaknap iti intero a lubong ti narelihiosuan a panangidumduma ken racismo. Dagiti panagduduma iti puli isut’ nangrubrob iti panagpipinnatay, panangparigat, ken dadduma pay a nakababain a kinadawel. Sigun iti padamag ti Amnesty International, dagiti panagsalungasing iti kalintegan ti tao isut’ nangpilit kadagiti nasurok a 23 a milion a tattao iti intero a lubong a pumanaw kadagiti pagtaenganda idi 1994.
Idiay laengen Rwanda, agarup 500,000 a tattao ti napapatay ken nasurok a 2,000,000 a sabsabali pay ti nagbalin a refugee kalpasan a bimtak ti kinaranggas iti nagbaetan dagiti Tutsi ken Hutu. “Nangnangruna a naidadanes dagiti Saksi ni Jehova,” ipadamag ti warnakan a Le Soir idiay Belgium, “gapu ta dida agiggem kadagiti armas.” Saan a makiraman dagiti Saksi ni Jehova kadagiti naarmasan a dangadang. Nupay kasta, ginasut kadakuada ti napapatay iti kinaranggas. Ipalagip daytoy kadatayo ti sasao ni Jesus kadagiti adalanna: “Agsipud ta saankayo a paset ti lubong, . . . ti lubong guraennakayo.”—Juan 15:19.
Nagnaed ti maysa a pamilia a Saksi—ni Eugène Ntabana, ti asawana, ken dua nga annakna—iti kabesera, ti Kigali. No ilawlawagna ti Nakristianuan a neutralidad kadagiti kaarrubana, masansan a dakamaten ni Eugène ti bougainvillea, agkalatkat a mula nga agbiag iti nadagaang a klima.—Mateo 22:21.
“Ditoy Kigali,” ilawlawag ni Eugène, “agsabong ti bougainvillea iti nalabaga, dumerosas, ken no dadduma puraw. Ngem, agkakapamiliada amin. Umasping met laeng kadagiti tattao. Nupay nagduduma ti puli, kolor ti kudil, wenno etniko a nalikudantayo, agkakapamiliatayo amin, ti pamilia ti sangatauan.”
Nakalkaldaang, iti laksid ti natalna a kasasaad ken neutral a takderda, ti pamilia Ntabana ket pinapatay dagiti mawaw iti dara a managderraaw. Kaskasdi, natayda a matalek. Makasigurotayo a tungpalento ni Jehova a Dios ti karina iti kakasta a tattao, ken mapagungardanto tapno tawiden ti lubong nga awanton ti panangidumduma. (Aramid 24:15) Iti kasta, ti pamilia Ntabana, agraman ti sabsabali pay, “maay-ayatandanto iti kinaruay ti talna.”—Salmo 37:11.