“Nakaskasdaaw a Sagut Manipud ken Jehova”

TI Mayo 1, 1996, a ruar Ti Pagwanawanan naglaon iti naan-anay a panangsalaysay iti Nakristianuan a neutralidad ken no kasano a timbengen dagiti responsabilidadtayo ken Jehova ken ni “Cesar.” (Mateo 22:21) Adu ti nangngegan a panangapresiar iti baro nga impormasion a naipaay. Ti surat iti sumaganad isut’ maysa kadagitoy, nga inaramid ti maysa a Saksi idiay Grecia ken naiturong iti Bagi a Manarawidwid dagiti Saksi ni Jehova:

“Iyebkasko ti napalaus a panagyamanko kadakayo amin patgek a kakabsat iti kasta a nasayaat a panangaywanyo kadakami iti naespirituan. Tangay agarup siam a tawen a naibaludak gapu iti Nakristianuan a pammatik, pudno nga apresiarek ti nakaskasdaaw a kapanunotan iti Mayo 1, 1996, a ruar Ti Pagwanawanan. (Isaias 2:4) Nakaskasdaaw daytoy a sagut manipud ken Jehova.​—Santiago 1:17.

“Bayat a tagtagiragsakek dagitoy nga artikulo, nalagipko ti komento iti immun-una a Pagwanawanan (Agosto 1, 1994, panid 14): ‘Nabatad, ti kinanainkalintegan ket napateg a galad, a mangtignay kadatayo nga ad-adda pay a mangayat ken Jehova.’ Wen, kakabsat, agyamanak ken Jehova ta pasetak ti naasi ken managayat nga organisasionna, a nabatad a mangyan-anninaw iti kinasiribna.​—Santiago 3:17.

“Ti naparang-ay a lawag iti Mayo 1 a Pagwanawanan nagustuanda unay ditoy Grecia, nangruna kadagidiay naibalud iti sumagmamano a tawen wenno sibabalud pay laeng gapu iti pammatida. Agyamanak manen. Sapay koma ta pabilgennakay ni Jehova babaen ti espirituna tapno itultuloyyo ti mangipaay kadakami iti napateg a naespirituan a taraon kadagitoy nariribuk a tiempo.”