Napasingkedan ti Kalintegan ti Nasaririt a Pammalubos

TI KABBARO a sentensia nga impaulog ti Hues iti Preliminary Investigations iti Korte ti Messina, Italia, pinasingkedanna a dagiti medikal a pagayatan ti nataengan a pasiente masapul a respetaren dagiti doktor. Naipaulog dayta a pangngeddeng sigun iti kaso a nakainaigan ti maysa a Saksi ni Jehova.

Idi Enero 1994, ni Antonino Stellario Lentini, 64-años a pasiente a Saksi a hemophiliac, intarayda idiay ospital ti Taormina, Messina. Ni Catena, nga asawa ni Antonino, inlawlawagna kadagiti mangngagas a tangay Saksida ni Jehova, madida ken lakayna nga agpayalison iti dara. (Aramid 15:20, 28, 29) Napatgan ti kiddawda.

Nupay kasta, idi inyakarda iti sabali nga ospital, bigla a saanen a makaanges ni Antonino ket delikadon idi dimmanon. Din nagbayag, natay. Naldaangan ni Catena, ngem naliwliwa unay gaput’ panagungar nga inkari ti Biblia. (Aramid 24:15) Idi kuan, naklaat unay, ta dagiti mahistrado​—a nalabit naallilaw gaput’ kamali a propaganda dagiti agiwarwarnak​—inakusarda nga isut’ makimbasol iti ipapatay ni lakayna gapu ta dina impalubos ti pannakaopera nga imbaga dagiti doktor a nesesita.

Kalpasan ti nasurok a nakatawen, idi Hulio 11, 1995, naabsuelto ni Catena, tangay awan basolna. Kinapudnona, sigun kadagiti testimonia dagiti eksperto iti medisina, gaput’ kagraben daydi pasiente, sayang met la koma ti aniaman a panangoperada.

Ngem ti deklarasion ti hues impasimudaagna ti kangrunaan nga isyu. Imbagana a, narigat nga akseptaren ti ideya a dagiti doktor kasapulan nga ipilitda ti agas a di kayat ti pasiente wenno dagidiay pannakabagina. Ti linteg ti medical deontological iti Italia, innayonna, “ipategna ti nasaririt a pammalubos daydiay maseknan sakbay ti aniaman nga ibaballaet.” Gapuna, kinunana a ni Catena “legal nga impawilna ti kasta a pannakaopera ni lakayna.”

Daytoy a desision pasingkedanna ti kalintegan ti maysa a nataengan nga agkedked nga umawat iti medikal nga agas a maisungani iti pagayatanna.