Siasinonto Dagiti Ebanghelisador?
ITI maysa a taripnong ti World Council of Churches agarup 40 a tawenen ti napalabas, naidagadag kadagiti miembro a “rummuarda a buyogen ti espiritu ti panagebanghelio” ken isuroda dagiti arbanda a “mapan agebanghelio.” Lima a tawen kalpasanna, insurat ni John A. O’Brien, maysa a Katoliko a klero, a masapul ti mangiserrek kadagiti baro nga adalan “babaen ti ipapan kadakuada,” a saan a basta “agtugtugaw idiay balaytayo.” Ket idi Enero 1994, kinuna ni Pope John Paul II a “saan a daytoy ti panawen nga ibain ti Ebanghelio, panawen daytoy nga ikasaba dayta iti tuktok ti balbalay.”
Nalawag a nayaleng-aleng dagitoy kadarato a panangawag kadagiti ebanghelisador. Kinuna ti maysa nga artikulo iti pagiwarnak ti Australia nga Illawarra Mercury: “Saan a magagaran dagiti prominente a Katoliko iti South Coast a mangtulad iti pamay-an dagiti Saksi ni Jehova a mangipakaammo iti pammatida.” Kinuna ti maysa a lalaki a ti panagebanghelio talaga a “saan a paset ti mentalidad dagiti Katoliko.” Kinuna ti sabali: “Nasayaat nga irakurak ti Simbaan ti bagina, ngem saan a babaen ti panagbalaybalay. Nalabit a nasaysayaat nga aramiden daytoy kadagiti eskuelaan wenno iti koreo.” Uray ti dekano ti maysa a lokal a katedral dina masinunuo ti kayat a sawen ti papa. “Kayattayo a paregtaen dagiti tattao nga agbiag a mayannurot iti Ebanghelio nga ammoda,” kinunana. “Diak makomentuan no panagbalaybalay ti kayatna a sawen.” Nagsayaat ti pannakagupgop dayta iti paulo ti maysa nga artikulo: “Saan nga ipangag dagiti Katoliko ti awag ti Papa a mangasaba.”
Nupay napaay ti Kakristianuan a mangasaba, nasurok a lima a milion a Saksi ni Jehova ti mangsursurot iti bilin ni Jesus nga “inkayo . . . ket mangaramidkayo kadagiti adalan a tattao iti isuamin a nasnasion.” (Mateo 28:19, 20; idiligyo ti Aramid 5:42.) Mangaskasabada itan iti binalaybalay iti nasurok a 230 a pagilian. Maysa a nagsayaat a mensahe ti idandanonda, a mangitamtampok kadagiti nakaskasdaaw a kari ti Biblia iti masanguanan. Apay a dikay makisarita kadakuada iti sumaruno nga isasarungkarda?