Asino ti Mapabasol iti Gubat?

TI KADI Dios ti mapabasol kadagiti panaggugubat ti tao? “Saan, saan a kayat ti Dios ti gubat.” Kasta ti sungbat ni Martin Niemöller, maysa a nalatak a Protestante a klero nga Aleman, iti daytoy a saludsod di nagbayag kalpasan ti Gubat Sangalubongan II. Naipablaak ti komentona idi 1946 iti libro a naawagan Ach Gott vom Himmel sieh darein​—Sechs Predigten (O Dios, Kumitaka Manipud Langit​—Innem a Sermon).a Kuna ti libro:

“Asinoman a mangpabasol iti Dios [kadagiti gubat] dina ammo, wenno dina kayat nga ammuen, ti Sao ti Dios. Siempre, sabali a saritaan no datayo a Kristiano ket addaan dakkel a sungsungbatan wenno awan kadagiti di agressat a gubat. Ket ditay nalaka a maliklikan daytoy a saludsod. . . . Mabalin met a lagipen a silalawag a dagiti Nakristianuan nga iglesia, iti intero a panawen, maulit-ulit a mangsupsuporta tapno bendisionanda dagiti panaggugubat, armada, ken armas ket ikarkararagda iti pamay-an a nakaro a di-nakristianuan iti pannakapapatay dagiti kabusorda iti gubat. Amin daytoy ket basoltayo ken dagiti ammatayo, ngem saan a pulos a maipabasol iti Dios. Ket datayo a Kristiano ita nakababaintayo iti sanguanan ti maaw-awagan a sekta a kas dagiti Napasnek nga Estudiante ti Biblia [dagiti Saksi ni Jehova], a ginasut ken rinibu kadakuada ti naipan kadagiti kampo konsentrasion ken napapatay [pay ketdi] gapu ta nagkedkedda iti panagserbi iti militar ken dida kayat ti pumatay.”

Ita, agarup 50 a tawen kalpasan ti Gubat Sangalubongan II, mangipaay ti sasao ni Niemöller iti pagpanunotan dagiti tao a managayat iti talna. Saan, saan a ti Dios ti mapabasol iti pannakaiparukpok ti dara kadagiti nasion! Kinapudnona, babaen kadagiti pudno a managdaydayawna, a di nakiraman kadagiti panagdadangadang iti lubong, iwarwaragawag ti Dios ti umad-adanin a panagngudo ti amin a gubat.​—Salmo 46:9; Juan 17:16.

[Footnote]

[Picture Credit Line iti panid 32]

Rinetrato ti USAF