Report Dagiti Manangiwaragawag ti Pagarian

Panangidanon iti Kinapudno iti Amin a Kita ti Tao

MAYSA ni apostol Pablo a naregta a manangiwaragawag iti Pagarian ti Dios. Dina impalubos ti ibubusor a manglapped iti annongenna a mangikasaba “iti naimbag a damag.” (1 Corinto 9:16; Aramid 13:50-52) Indagadag ni Pablo kadagiti sabsabali a tuladenda ti ulidanna.​—1 Corinto 11:1.

Nalatak dagiti Saksi ni Jehova iti intero a lubong gapu iti kinapingetda a mangasaba. Kinapudnona, makisaritada kadagiti sabsabali agpada iti “mainugot a panawen” ken iti “nariribuk a panawen” tapno matungpal ti inted-Dios a trabahoda a ‘panangaramid kadagiti adalan.’ (2 Timoteo 4:2; Mateo 28:19, 20) Uray kadagiti pagilian nga adda ibubusor, maidandanon kadagiti nasingpet-panagpuspusona a tattao ti kapatgan a mensahe maipapan iti Pagarian ti Dios, kas iladawan dagiti sumaganad a kapadasan.

◻ Iti maysa a puro iti makinlaud a Pacifico a sadiay napawilan ti trabaho dagiti Saksi ni Jehova, nadlaw ti maysa a 12-ti-tawenna a barito nga isu ket nalikmut kadagiti dakes a katimpuyog idiay eskuelaan. Adu kadagiti kaeskuelaanna ti agsigsigarilio, agbasa iti pornograpiko a literatura, mangraut kadagiti mannursuro, ken mannakilaban. Kimmaro ti kasasaad ket kiniddaw ti barito ken ni tatangna no mabalinna ti umakar iti sabali nga eskuelaan. Ngem, nakirinnason ti ama iti anakna ket di immanamong iti kasta a kapanunotan, tangay iti panagkunana awan nakaidumaan ti kababalin dagiti estudiante iti dadduma a kabangibang nga eskuelaan. Ngem, kasanona a tinulongan ti anakna?

Nalagip ti ama nga adda maysa a libro iti pagtaenganda nga agpaay kadagiti agtutubo. Regalo dayta ti kabagian a maysa kadagiti Saksi ni Jehova. Gapuna, binirokna ti libro, ket idi nasarakanna, intedna iti anakna. Napauluan dayta iti Dagiti Saludsod nga Iyimtuod ti Agtutubo​—Dagiti Sungbat nga Epektibo.a Nasarakan ti barito a makatulong unay ti kapitulo a “Kasanok a Mapagballigian ti Panangpilpilit Dagiti Kapatadak?” Saanna laeng nga insuro ti kinapateg ti panangmantener iti panagraem iti bagi no di ket insurona met no kasano ti agkedked a sitataktika no gay-aten ti sabsabali a piliten a sumurot iti di nainsiriban a kababalin. Gapu iti panangyaplikarna kadagiti Nainkasuratan a prinsipio a masarakan iti libro, nasursuro ti agtutubo a lalaki no kasano a sarangten a sibaballigi ti panangpilpilit dagiti kapatadan.

Idi nadlawna daytoy ken ti dadduma pay a positibo panagbalbaliw iti anakna, inkeddeng ti ama a basaen ti libro. Gapu ta nagustuanna ti praktikal a balakad a masarakan iti libro, kiniddaw ti ama kadagiti Saksi ni Jehova nga iyadalanda iti Biblia iti pagtaenganna. Idi agangay, nakipagadal met ti dadduma a kameng ti pamiliana. Ti resulta? Ti barito, ti adienna a lalaki, ti amana, ken dua kadagiti apong ti barito ket Saksi ni Jehova-da itan.

◻ Iti isu met laeng a pagilian, dua a Saksi ni Jehova ti naibalud gapu iti nainget a panangsurotda kadagiti prinsipio ti Biblia. Nupay kasta, dida impalubos a ti kasasaadda ti manglapped kadakuada nga agsao a situtured maipapan iti Pagarian ti Dios. Kinasaritada ti maysa nga opisial ti pagbaludan ket napalubosanda a mangselebrar iti Pangrabii ti Apo sadiay. Anian a ragsakda idi 14 a balud ti nangyebkas iti panaginteresda iti Biblia ken nakikadua kadagiti Saksi iti daytoy napateg nga okasion! Kalpasan ti pannakawayawayada, intultuloy ti dadduma kadakuada ti nagadal iti Biblia ken nakitimpuyog kadagiti Saksi ni Jehova.

Iti nasurok a 25 a pagilian, agsagsagaba dagiti Saksi ni Jehova gapu iti panangipawil wenno nadumaduma a kita ti ibubusor wenno panangidadanes. Ngem, kas kadagiti apostol, itultuloyda nga “awan sardayna a mangisursuro ken mangidekdeklara iti naimbag a damag maipapan iti Kristo, a ni Jesus.”​—Aramid 5:42.

[Footnote]