Maysa Pay a Balligi Para Kadagiti Saksi ni Jehova Idiay Grecia
IDI Oktubre 6, 1995, dinengngeg ti tallot’-miembrona a Korte ti Mahistrado iti Atenas ti maysa a kaso legal a nakairamanan ti dua nga amin-tiempo a ministro dagiti Saksi ni Jehova. Ti pammabasol ket panangkomberte, ket maysa a polis ti nagdarum kalpasan nga isut’ sinarungkaran dagiti Saksi iti pagtaenganna.
Impakita dagiti saludsod nga insango ti mamangulo a hues nga isu ket interesado unay iti trabaho dagiti Saksi ni Jehova. Kas pagarigan, insaludsodna: “Kasanot’ kabayagnan nga ar-aramidenyo daytoy a trabaho? Kasanot’ panangtratar kadakayo dagiti tao kadagiti naglabas a tawen? Ania ti makunada iti trabahoyo? Aniat’ ibagbagayo kadagiti tattao iti pagtaenganda?” Sipapasnek a nagdengngeg amin nga adda iti korte iti nasayaat a pammaneknek a naipaay.
Nasdaaw dagiti Saksi, ta uray ti piskal nagsarita a pabor kadakuada. “Adda kalintegan dagiti Saksi ni Jehova sigun iti konstitusion a saan laeng a mamati ken agdayaw iti Diosda,” kinunana iti panggibus a sasaona, “no di pay ket mangisaknap iti pammatida iti binalaybalay, kadagiti plasa, ken kadagiti lansangan, uray agiwaras pay ketdi kadagiti literaturada nga awan bayadna no isut’ kayatda.” Nangdakamat ti piskal iti nadumaduma a pangngeddeng ti pannakaabsuelto nga inyetnag dagiti korte ken ti Konseho ti Estado. Dinakamatna pay ti kaso ti Kokkinakis v. Grecia, a naikeddeng a pabor kadagiti Saksi ni Jehova ti European Court of Human Rights.a “Panunotenyo koma,” impakdaar ti piskal, “a nagmulta pay ketdi ti Grecia iti daytoy a kaso. Gapuna rumbeng nga agannadtayo a naimbag no makiddawtayo a manghusgar iti kakasta a kaso. Kinapudnona, iti rugi pay laeng di pulos rumbeng nga isaklang iti korte ti kakastoy a kaso.”
Idi nalpas ti panagsarita ti piskal, awanen ti maikuna pay ti abogado dagiti Saksi. Nupay kasta, ginundawayanna nga impaganetget a ti linteg iti proselitismo ket maibusor iti paglintegan ken nakaibabainan ti Grecia iti intero a lubong.
Tinaldiapan laeng ti mamangulo a hues ti sabali pay a dua a hues, ket nagkaykaysada a nangabsuelto iti kabsat a lalaki ken babai. Ti bista, a nagpaut iti maysa nga oras ken sangapulo a minuto, ket maysa a panagballigi para iti nagan ni Jehova ken iti ilina.
Daytoy ti maikapat a pannakaabsuelto mainaig kadagiti kaso ti panangkomberte kalpasan a dinengngeg ti European Court of Human Rights ti kaso ni Kokkinakis. Maragsakan dagiti Saksi ni Jehova idiay Grecia ta dagiti parikut mainaig iti panangasabada ket gistay awanen ket mabalin nga itultuloy ti trabaho nga awan tuben.
[Footnote]