Siasino ti Mangkonkontrol?

“SIASINO ti mangiturturay iti lubong?” No adda mangsaludsod kadakayo iti kasta, kasanoyo a sungbatan? Nalabit kuna ti kaaduan a relihioso a tattao a ti “Dios” wenno ni “Jesus.” Ti artikulo nga agparang iti The Freeport News, maysa a pagiwarnak idiay Bahamas, mangipaay iti sungbat a di ninamnama ti kaaduan.

“Nakasarakak iti maysa a tract iti asideg ti ruanganko,” kuna ti nangisurat iti artikulo. “Kaaduanna diak ikankano ti kasta a banag, ngem iti daytoy a gundaway inkeddengko a basaen. Kastoy ti saludsod iti paulona, ‘Sino a Talaga ti Agturay ti Lubong?’” Babaen ti panangbasana iti naibatay-Biblia a tract, naammuan daytoy a babai a saan a ti Dios wenno ni Jesus ti agturay iti daytoy a lubong no di ket ni Satanas a Diablo.​—Juan 12:31; 14:30; 16:11; 1 Juan 5:19.

“Usigenyo ti aglablabes a kinadangkok,” ilawlawag ti tract. “Inusaren dagiti tao dagiti gas chamber, kampo konsentrasion, flamethrowers, bomba a napalm, ken dadduma pay a nakarangranggas a pamay-an ti panangtutuok ken panangpapatay iti maysa ken maysa nga awanan asi. . . . Ania dagiti puersa a mangiduron kadagiti tao a mangaramid kadagita makarimon nga ar-aramid wenno mamagbalin iti kasasaad a pakapilitanda a mangaramid iti kinadangkok? Napanunotyo kadin nga adda dakes, di makita a pannakabalin a mangim-impluensia kadagiti tao nga agaramid kadagita a kinaranggas?” Makapakellaat kadi nga awagan ti Biblia ni Satanas a “ti dios daytoy a sistema ti bambanag”?​—2 Corinto 4:4.

Makaparagsak, asidegen ti pannakapukaw ni Satanas ken dagiti demoniona. “Ti lubong aglabas ken kasta met ti tarigagayna, ngem ti mangaramid iti pagayatan ti Dios agtalinaed iti agnanayon.” (1 Juan 2:17) Wen, ikari ti Biblia a dagidiay agaramid iti pagayatan ti Dios addaanda iti namnama nga agbiag nga agnanayon iti nalinteg a baro a lubong. (Salmo 37:9-11; 2 Pedro 3:13; Apocalipsis 21:3, 4) Anian a bang-ar inton maikkat ti dakes nga impluensia ni Satanas ken dagiti demoniona!

Kalpasan ti pananggupgopna iti linaon daytoy bassit a tract, naikuna ti mannurat iti artikulo ti The Freeport News: “Pudno a maragsakanak ta binasak dayta a tract . . . gapu ta maseknanak met iti kasasaad ti lubong, ken no siasino ti mangkonkontrol.”