‘Ti Dios ti Pagkamangak’

KADAGITOY “napeggad a tiempo a narigat a pakilangenan,” umad-adu dagiti sulisog ken pakarigatan. Kas pagarigan, ti kinamapagtalkantayo, mabalin a masuot iti pagtartrabahuan. Ti kinadalustayo mabalin a masuot kadagiti kaeskuelaantayo. Ken ti kinatarnawtayo masansan a suoten ti lubong a nakillo iti moral.​—2 Timoteo 3:1-5.

Nagbiag met ti mannurat iti Biblia a ni Asaf idi panawen a nasaknap ti kinadangkes. Impannakkel pay ketdi ti dadduma kadagiti kapatadanna ti nadangkes a kababalinda. “Ti kinatangsit isu ti kas kawar a naipulipol iti tengngedda,” insurat ni Asaf. “Ti panagrabsut mangbungon kadakuada a kas kawes. Mangrabrabngis, ket iti kinadakes agiyebkasda iti panangidadanes: agsaoda a sipapalangguad.” (Salmo 73:6, 8) Pamiliar kadi kadakayo daytoy a kababalin?

Kadagidiay agtarigagay a mangaramid iti umiso, makapaladingit unay ken makapaupay pay ketdi ti kasta a kababalin. “Agmalmalem a nadidigraak,” insennaay ni Asaf. “Napalalo ti rigatko.” (Salmo 73:14, 16) Mabalin a kasta met ti panagriknayo, ngem dikay maupay! Napagballigian ni Asaf ti kinadangkes idi kaaldawanna, ket maaramidanyo met dayta. Ngem kasano?

Nabigbig ni Asaf a gistay imposible a masarakan ti pudno a hustisia iti sidong ti imperpekto a panangituray ti tao. (Salmo 146:3, 4; Proverbio 17:23) Gapuna, imbes a sayangenna ti napateg a tiempo, pigsa, ken sanikuana a mangpadpadas a mangikkat iti amin a kinadakes iti aglikmutna, impangpangrunana ti relasionna iti Dios. Indeklara ni Asaf: “Ngem nasayaat nga umas-asidegak iti Dios: pinagbalinko ni Apo Jehova a kamangko.”​—Salmo 73:28.

Ita, dagidiay makiramraman iti dakes nga aramid iti negosio masansan a tagiragsakenda dagiti bentaha iti material. Mabalin nga ipasindayag pay ketdi ti adu ti panagsalungasingda kadagiti moral a paglintegan ti Dios. Ngem saanda a manayon. “Pudno nga ikabilmo ida kadagiti nagalis a yan,” kinuna ni Asaf. “Itublakmo ida iti pannakadadael.”​—Salmo 73:18.

Wen, iti naituding a tiempo ti Dios, ti panangallilaw, kinaranggas, ken kinadakes, kasta met ti amin a sabsabali pay a di-nadiosan nga ar-aramid a kasapulan nga idian dagiti pudno a Kristiano, maawanton. Ikari ti Biblia: “Dagiti agaramid iti dakes magessatdanto; ngem dagidiay nga agpannuray ken Jehova, tawidendanto ti daga.” (Salmo 37:9) Kabayatanna, itandudotay koma ti sasao ti salmista a kinunana: “Ni Jehova isu ti batok, ken sarikedkedko, ken mangispal kaniak, Diosko, batok, isu a pagkamangakto.”​—Salmo 18:2.